Արշակ Կարապետյանը ՌԴ-ում մասնակցել է ԱՊՀ պաշտպանության նախարարների խորհրդի նիստին

ԵՐԵՎԱՆ, 10 նոյեմբերի – Sputnik. ՀՀ պաշտպանության նախարար Արշակ Կարապետյանն այսօր մասնակցել է Մոսկվայում կայացած ԱՊՀ մասնակից պետությունների պաշտպանության նախարարների խորհրդի հերթական նիստին, տեղեկությունը հայտնում է ՀՀ պաշտպանության նախարարությունը։

«Նիստի ընթացքում քննարկվել է օրակարգում ընդգրկված 20-ից ավելի հարց։ Մասնավորապես, անդրադարձ է կատարվել պաշտպանական ոլորտում բազմակողմ փոխգործակցության զարգացմանը, ՀՕՊ միացյալ համակարգի «Տարածաշրջանային անվտանգություն-2022» համատեղ համակարգչային հրամանատարաշտաբային զորավարժության անցկացմանը, զորքերի՝ համաճարակի դեմ ուղղված պայքարին, համատեղ ինժեներական ստորաբաժանումների մարդասիրական ականազերծմանը, զինվորական կադրերի համատեղ պատրաստմանը»,–նշված է հաղորդագրության մեջ։

ԱՊՀ պաշտպանության նախարարների խորհրդի անդամները կարծիքներ են փոխանակել ռազմաքաղաքական իրավիճակի ու անվտանգության հարցերի շուրջ, ինչպես նաև բարձր են գնահատել ԱՊՀ ձևաչափով ռազմական համագործակցության 30-ամյա փորձն ու զարգացման ուղղությունները: Նիստի ավարտին ստորագրվել են ԱՊՀ մասնակից պետությունների պաշտպանության նախարարների խորհրդի բոլոր որոշումները, այդ թվում նաև 2022թ. աշխատանքային պլանը:

Հիշեցնենք, որ Կարապետյանի գլխավորած պատվիրակությունը երեկ է մեկնել Մոսկվա` մասնակցելու ԱՊՀ մասնակից պետությունների պաշտպանության նախարարների խորհրդի հերթական նիստին: