ԵՐԵՎԱՆ, 9 նոյեմբերի – Sputnik. ՀՀ վարչապետ Նիկոլ Փաշինյանը Մանե Գևորգյանին ազատել է պաշտոնից։ Համապատասխան որոշումը հրապարակված է ՀՀ կառավարության էլեկտրոնային տեղեկատվական հարթակում։
«Ղեկավարվելով «Հանրային ծառայության մասին» օրենքի 9-րդ հոդվածի 10-րդ մասով՝ Մանե Գևորգյանին ազատել վարչապետի մամուլի քարտուղարի պաշտոնից»,–ասվում է Փաշինյանի որոշման մեջ:
Աշխատանքից ազատվելու մասին Facebook-ում հրապարակում է արել նաև ինքը` Գևորգյանը։
Նա նշել է, որ սեփական դիմումի համաձայն է ազատվել վարչապետի մամուլի քարտուղարի պաշտոնից։ Նա շնորհակալություն է հայտնել վարչապետին, կառավարության աշխատակազմին համատեղ աշխատանքի համար։
«Վարչապետի մամուլի քարտուղարի պարտականությունները կատարելու ընթացքը լի էր Հայաստանին բաժին հասած դժվարություններով, չնայած ամենին՝ փորձել եմ հավատարիմ մնալ այն արժեքներին, որոնք դրվել էին 2018-ի հեղափոխության հիմքում։ Ներողություն եմ հայցում բոլոր նրանցից, որոնց հույսերը չեմ արդարացրել այս պաշտոնում»,–գրել է Մանե Գևորգյանը։
Հիշեցնենք, որ Գևորգյանն այդ պաշտոնին էր նշանակվել 2020-ի մարտի 2-ին։ Իսկ դրանից առաջ նա «Ավրորա» մարդասիրական նախաձեռնության IDeA հիմնադրամի միջազգային լրատվամիջոցների հետ կապերի համակարգողն էր։
Մանե Գևորգյանը նաև «Սիվիլնեթ» առցանց հեռուստատեսություն, «Սիվիլիթաս» հիմնադրամի գլխավոր պրոդյուսերն է եղել։