«Մոդեռնա» ընկերության պատվաստանյութի հերթական խմբաքանակը Հայաստանում է

ԵՐԵՎԱՆ, 9 նոյեմբերի – Sputnik. «Մոդեռնա» ընկերության 60 700 դեղաչափ պատվաստանյութն արդեն Հայաստանում է։ Այս մասին հայտնում են ՀՀ առողջապահության նախարարությունից։

ԱՆ–ից տեղեկացնում են նաև, որ այն կիրառվում է 12 և բարձր տարիքի անձանց շրջանում COVID-19-ի դեմ պատվաստումներ իրականացնելու համար:

Հիշեցնենք, որ հոկտեմբերի 30-ին Հայաստան էր բերվել Նորվեգիայի կողմից «Թիմ Եվրոպա» նախաձեռնության շրջանակում հասանելի «ԵՄ քաղաքացիական պաշտպանության մեխանիզմի» աջակցությամբ նվիրաբերված «Մոդեռնա» պատվաստանյութի 620 000 դեղաչափ։

Նշենք՝ «Մոդեռնա» ընկերության պատվաստանյութի առաջին խմբաքանակը՝ 50 հազար դեղաչափ, Հայաստանին էր փոխանցել Լիտվան։

Հայաստանում կորոնավիրուսի դեմ պատվաստում են «Սպուտնիկ V», «AstraZeneca», «Sinopharm», «Coronavac», «Moderna» պատվաստանյութերով։