ԵՐԵՎԱՆ, 9 նոյեմբերի – Sputnik. Շուշիի մոտ նոյեմբերի 8-ին ադրբեջանական կողմի արձակած կրակոցները, ինչի պատճառով կա 1 զոհ և 3 վիրավոր, ԱԺ նախագահ Ալեն Սիմոնյանը սադրիչ անվանեց։ Այս մասին ԱԺ նախագահ նա ասաց ԱԺ-ում շուշեցի հայազգի ճարտարապետների գործերի ցուցադրության ժամանակ լրագրողների հետ ճեպազրույցում։
«Նորմալ չի, երբ ադրբեջանական կողմը կրակ է արձակում։ Այդ ամենը դատապարտելի է, և դա կապված է Ադրբեջանի րոպեական «հաջողության» պոռթկումներով։ Այսօր ես կարող եմ բարձր հայտարարություններ անել, վատ բառեր ասել, սակայն դրանից այդ կրակոցները կշատանան»,- նշեց ԱԺ նախագահը։
Սիմոնյանը շեշտեց, որ պետք է գնալ երկարատև խաղաղության ճանապարհով, որպեսզի հնարավոր լինի երկիրը կառուցել։ Նա ընդգծեց նաև, որ նման պարագայում պետք է մի իրավիճակ, որտեղ հնարավոր կլինի Մինսկի խմբի համանախագահների հետ քննարկել ու շարունակել Արցախի հարցով ընդհատված քննարկումները։
Լրագրողի այն դիտարկմանը, թե հակառակորդը շարունակում է կրակել անգամ խաղաղ բնակիչների ուղղությամբ, հայկական կողմն էլ այդ ընթացքում խաղաղության կոչեր է անում, խորհրդարանի ղեկավարը հարցով պատասխանեց․ «Եթե պատերազմի կոչեր անենք, նրանք կդադարե՞ն կրակել»։
Հիշեցնենք, որ նոյեմբերի 8-ին, ժամը 15։00-ին, Արցախի Հանրապետության Շուշի քաղաքի մուտքի մոտակա խաչմերուկի հարևանությամբ ադրբեջանական կողմը կրակոցներ է արձակել ջրամատակարարման խողովակների վրա շինարարական աշխատանքներ իրականացնող քաղաքացիական անձանց ուղղությամբ, ինչի հետևանքով տուժել են 4 քաղաքացիական անձինք, որոնցից մեկը՝ 22-ամյա Ե․Մ-ն, մահացել է, երեքին (41-ամյա Ս․Ա, 31-ամյա Մ․Գ․, 43-ամյա Դ․Գ․) ցուցաբերվում է բժշկական օգնություն։ Ավելի ուշ ԱՀ առողջապահության նախարարությունից հայտնել էին, որ վիրավորներից 2-ի վիճակը գնահատվում է միջին ծանրության, իսկ 1-ինը՝ ծանր։