ԵՐԵՎԱՆ, 8 նոյեմբերի – Sputnik. Բելառուսում բազմաթիվ փախստականներ երեխաների հետ, անձնական իրերով, մայրուղու երկայնքով շարժվում են դեպի Լեհաստանի սահման։ Այս մասին հայտնում է Sputnik Բելառուսը՝ վկայակոչելով երկրի պետական սահմանային կոմիտեին։
Իրավապահ մարմիններն անհրաժեշտ միջոցներ են ձեռնարկում իրավակարգի պահպանությունն ապահովելու ուղղությամբ:
Ինչպես դեպքի վայրից հայտնում է Sputnik Բելառուսի թղթակիցը` փախստականներն անտառի միջով են գնում՝ պայուսակներով և երեխաների հետ։ Խումբը մոտ 500 մետր է հեռու սահմանից։
Բելառուսական կողմը համապատասխան միջոցներ է ձեռնարկում, որպեսզի ապահովի միջազգային հաղորդակցության ուղիների անխափան գործունեությունը, ինչպես նաև ավտոմայրուղու երկայնքով շարժվող մարդկանց անվտանգությունը:
Սահմանին տիրող իրավիճակից ելնելով Բելառուսի սահմանապահներն անցել են ուժեղացված ծառայության։
Այսօր ավելի քան հազար փախստական Բելառուսից սկսել են շարժվել դեպի լեհական սահման։
Լեհաստանում այդ գործողությունները կոչել են «Լեհաստանի տարածք զանգվածային ներթափանցման խոշորագույն փորձ»։
Դեռ շաբաթներ առաջ Բելառուսի և Լեհաստանի սահմանին փշալարերով ժամանակավոր պատնեշ է տեղադրվել:
Ինչպես պարզաբանել է Լեհաստանի ներքին գործերի և վարչակազմի նախարար Մարիուշ Կամինսկին՝ Բելառուսի հետ սահմանին մշտական պարիսպ կկառուցվի, որը կունենա նաև շարժման արձանագրման հատուկ համակարգ։
Նախնական տվյալներով՝ նախագծի իրականացումը լեհական գանձարանի համար կարժենա 1,615 միլիարդ զլոտի (ավելի քան 400 մլն դոլար):