ԵՐԵՎԱՆ, 8 նոյեմբերի – Sputnik. Հայաստանը Լեռնային Ղարաբաղում տարածքների կորստի հետ մեկտեղ կորցրել է իր առավելությունները ԼՂ խնդրի կարգավորման բանակցություններում։ Ազատության հրապարակում ընթացող ընդդիմության հանրահավաքի ժամանակ այս մասին հայտարարեց ՀՀ 2–րդ նախագահ, «Հայաստան» դաշինքի ղեկավար Ռոբերտ Քոչարյանը։
Քոչարյանի խոսքով`Ղարաբաղյան առաջին պատերազմում տարած հաղթանակից հետո մեր բանակցային դիրքերը խարսխված էին հաղթանակների վրա, դա անվտանգության գոտին էր Ղարաբաղի շուրջ` յոթ շրջանները, դա Հայաստանի մարտունակ բանակն էր և այն փաստը, որ Հայաստանը Ղարաղաղի անվտանգության երաշխավորն է եղել։ Բացի այդ, դա Հայաստան–Ղարաբաղ ընդհանուր սահմանն էր ` Վարդենիսից մինչև Արաքս գետ, և դա ուժ էր տալիս բանակցային ամբողջ գործընթացում և քայլ առ քայլ Հայաստանն արձանագրում էր դիվանագիտական հաղթանակներ։
«Հիմա այդ առավելությունները չկան, քանի որ մեկ մարդ որոշել է, որ ինքը բանակցությունները սկսելու է զրոյական կետից, ուրեմն ինքը պետք է զրոյացներ մեր բոլոր բանակցային առավելությունները, մեր հաղթանակած առավելությունները։ Հիմա ի՞նչ ենք բանակցելու։ Բանակցությունները հաջողված են լինում, երբ հիմնվում են փոխզիջումների վրա, հիմա մենք էլ ի՞նչ ունենք փոխզիջելու»,–ասաց ՀՀ երկրորդ նախագահը։
Հիշեցնենք` Երևանի Ազատության հրապարակում «Հայաստան» դաշինքը հանրահավաք է կազմակերպել։
ԱԺ «Հայաստան» խմբակցության պատգամավոր Իշխան Սաղաթելյանը հայտարարեց, որ սկսում են Համազգային դիմադրության շարժում։