Կորոնավիրուսը մեր երկրում շարունակեց իր մահաբեր գործը նաև անցնող շաբաթվա ընթացքում՝ գրանցելով մահերի հակառեկորդներ։ Համավարակի դեմն առնելու համար առողջապահության նախարարությունն առաջարկում է թեստավորման հաճախականությունը կրճատել՝ դարձնելով շաբաթը 1 անգամ, իսկ թատրոն, ռեստորան մուտքն էլ թույլատրել միայն պատվաստված քաղաքացիներին։
Մի կողմից շտապօգնության ծառայությունն աշխատում է գերծանրաբեռնված՝ կանչից կանչի շտապելով, մյուս կողմից շտապօգնության վարորդները գործադուլ անելու ժամանակ գտան։ Պահանջում են աշխատավարձի բարձրացում։
Հերթական անգամ կառավարության շենքի մոտ էլ բողոքի ակցիա անցկացրեցին անհետ կորած և գերեվարված զինծառայողների հարազատներն ու հերթական անգամ իրենց հարցերի պատասխանը չգտան։ Պարզվեց, որ Հայաստանի և Ռուսաստանի ԱԳ նախարարների մակարդակով քննարկվում է քարտեզների փոխանակում գերիների հետ։
Շաբաթվա վերջում էլ զանգվածային թունավորման դեպք գրանցվեց․ ԱՆ տվյալներով՝ 120-ից ավելի քաղաքացիներ բուժօգնության են դիմել աղիքային վարակի ախտանշաններով․ նրանք բոլորը սնվել էին «Տաշիր պիցցա» ցանցի տարբեր մասնաճյուղերում։
Շաբաթվա այս ու այլ հետաքրքիր իրադարձությունները՝ Sputnik Արմենիայի լուսանկարիչների աչքերով։