Բողոքի լայնածավալ ցույցեր են ընթանում Շոտլանդիայի արևմտյան մասում գտնվող Գլազգո քաղաքում, որտեղ ընթանում է ՄԱԿ-ի Կլիմայի փոփոխության շրջանակային կոնվենցիայի համաժողովի 26-րդ նստաշրջանը։ Շվեդ էկոակտիվիստ Գրետա Թունբերգը, որն ավելի վաղ բողոքի ակցիաների կոչ էր արել, երեկ ասել է, որ ՄԱԿ-ի կլիմայի համաժողովը վերածվել է PR ակցիայի։
Ըստ բողոքի ակցիայի կազմակերպիչների՝ երեկվա ակցիային մասնակցել է մոտ 25 հազար մարդ, իսկ այսօր՝ Գործողությունների համաշխարհային օրը, ցուցարարների թիվը կարող է հասնել 50 հազարի։
Համաժողովում շուրջ 200 երկրների ներկայացուցիչներ ամփոփում են 2015 թվականի Փարիզի կլիմայական համաձայնագրի առաջին արդյունքները և պլանավորում առաջիկա տարիների գործողություններ։ Մի շարք երկրներ, այդ թվում՝ Ռուսաստանը, ԱՄՆ-ն և Մեծ Բրիտանիան, արդեն պայմանավորվել են առաջիկա 9 տարում դադարեցնել անտառահատումները։
Բացի այդ, յուրաքանչյուր երկիր ներկայացրել է ջերմոցային գազերի արտանետումները նվազեցնելու իր ծրագրերը։ Գիտնականները կարծում են, որ մինչև 2050 թվականը դրանք պետք է հասցվեն զրոյի. միայն այդ դեպքում հնարավոր կլինի խուսափել համաշխարհային աղետից։