ԵՐԵՎԱՆ, 6 նոյեմբերի – Sputnik. ԱՄՆ նախկին նախագահ Դոնալդ Թրամփը «Christ Stigall» Show հաղորդման ժամանակ ասել է, թե հնարավոր է՝ դերասան Ալեք Բոլդուինը նկարահանման հրապարակում դիտավորյալ է սպանել օպերատոր Հալինա Հաթչինսին։
«Սարսափելի բան կասեմ, բայց գուցե նա անձամբ է լիցքավորել ատրճանակը։ Օրինակ՝ եթե իմ ձեռքը ատրճանակ լիներ, ես այն երբեք մարդկանց վրա չէի պահի ու կրակի։ Այն էլ ոչ թե դերասանների ուղղությամբ, այլ օպերատորի ու ռեժիսորի։ Նա լավ գործեր ունի կինոյում, վատ գործեր էլ ունի, բայց նա գիժ է փաստորեն․․․», - ասել է Թրամփը։
ԱՄՆ նախկին նախագահը հավանաբար չի կարողանում մոռանալ, որ Բոլդուինը նրան մարմնավորել էր քոմեդի սքեթչում։
Հիշեցնենք՝ հոկտեմբերի 22-ին Նյու Մեքսիկոյում «Ժանգը» մարտաֆիլմի նկարահանման ժամանակ Բոլդուինը պատահաբար սպանել էր ֆիլմի օպերատորին:
Ըստ սցենարի` Բոլդուինը պետք է կրակեր չլիցքավորված ատրճանակից ու ոչ մարտական փամփուշտներով: Բայց կրակոցի պահին փամփուշտը դուրս էր թռել ատրճանակից, բեկորները ցրվել էին ու վիրավորել նկարահանման հրապարակում գտնվող երկու անձի` ռեժիսոր Ջոել Սոուզին ու օպերատոր Հալինա Հաթչինսին։ Նրանք ուղղաթիռով հոսպիտալացվել էին, բայց 42-ամյա կին օպերատորի կյանքը փրկել չէր հաջողվել: