Վարչապետ Նիկոլ Փաշինյանն ընդունել է Ռուսաստանի Դաշնության գիտությունների ակադեմիայի նախագահ, ակադեմիկոս Ալեքսանդր Սերգեևին: Այս մասին տեղեկացնում են վարչապետի աշխատակազմից։
Վարչապետը կարևորել է Հայաստանի և Ռուսաստանի միջև գիտության ոլորտում համագործակցության զարգացումն ու ընդլայնումը և նշել, որ գիտության ու կրթության ոլորտը ՀՀ կառավարության առաջնահերթությունների թվում է. 2022 թվականի համար գիտության ոլորտին տրամադրվող ֆինասնական միջոցներն ավելանալու են 85 տոկոսով։
Ալեքսանդր Սերգեևը նշել է, որ ԽՍՀՄ տարիներին հայ և ռուս գիտնականների միջև փոխգործակցությունը եղել է բարձր մակարդակի վրա, հայ գիտնականներն իրենց զգալի ավանդն են ներդրել ոլորտի զարգացման գործում: Նա կարևորել է գիտական նոր մշակումների, փորձի փոխանակման, երիտասարդ մասնագետների կրթության ու որակավորման բարձրացման ուղղությամբ համատեղ ծրագրերի իրականացումը:
Վարչապետ Փաշինյանը ողջունել է գիտության ոլորտում հայ-ռուսական կապերի ընդլայնմանն ուղղված նախաձեռնությունները և նշել, որ ՀՀ կառավարությունն ամեն կերպ կաջակցի դրանց հաջող իրականացմանը: