ԵՐԵՎԱՆ, 5 նոյեմբերի - Sputnik. Օքսֆորդի համալսարանի գիտնականների հայտնաբերած գենը գրեթե կրկնակի մեծացնում է Covid-19 հիվանդության ծանր ընթացքի ռիսկը: Գիտնականներն իրենց հետազոտությունը հրապարակել են «Nature Genetics» գիտական ամսագրում։
Մասնագետները կատարել են ընդհանուր գենոմային վերլուծություն (GWAS) և բացահայտել 3p21.31 քրոմոսոմային տարածքը, որը կապված է Covid-19-ի շնչառական ուղիների չաշխատելու ռիսկի կրկնակի ավելացման հետ:
«Մենք կիրառեցինք մեքենայական ուսուցման ու մոլեկուլային կենսաբանության պլատֆորմը GWAS-ի արդյունքները վերծանելու համար ու հայտնաբերեցինք LZTFL1 համեմատաբար չուսումնասիրված գենը` որպես նման ռիսկի առաջացման պոտենցիալ պատասխանատու», - նշվում է զեկույցում:
Գիտնականների խոսքով` ռիսկային գենը հանդիպում է հարավասիական ծագում ունեցող մարդկանց 60 տոկոսի ու եվրոպացիների միայն 15 տոկոսի մոտ: Նրանք նշում են, որ դրանով մասամբ բացատրվում է Բրիտանիայի որոշ շրջաններում մահացության ծայրահեղ բարձր մակարդակը: Սակայն LZTFL1 գենը չի կարելի դիտարկել որպես Covid-19-ի շնչառական բարդությունների միակ պատճառ, քանի որ կարևոր դեր ունեն նաև սոցիալ-տնտեսական պայմանները: