Եկող շաբաթ պարզ կլինի` ով կղեկավարի Գորիս խոշորացված համայնքը

ԵՐԵՎԱՆ, 5 նոյեմբերի - Sputnik. Գորիս խոշորացված համայնքի ավագանու առաջին նիստը կկայանա եկող շաբաթվա ընթացքում, որի ժամանակ կդրվի համայնքի ղեկավար ընտրելու հարցը։ Տեղեկությունը Sputnik Արմենիայի հետ զրույցում ասաց ավագանու անդամ Մենուա Հովսեփյանը։

«Իհարկե դա հարց չէ, քանզի Գորիս խոշորացված համայնքում «Առուշ Առուշանյան» դաշինքը բացարձակ մեծամասնություն է, և Առուշ Առուշանյանը ավտոմատ կերպով կդառնա Գորիսի խոշորացված համայնքի ղեկավար։

Հովսեփյանը նաև տեղեկացրեց, որ Գորիսի նախկին փոխքաղաքապետ Իրինա Յոլյանը ևս ընդգրկված է ավագանու կազմում։

Հիշեցնենք, որ Առուշանյանը կալանավորված է 2021թ.–ի հուլիսի 16-ից: Գորիսի համայնքապետին մեղադրանք է առաջադրվել ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով և 38-154.2-րդ հոդվածի 3-րդ մասով (քվեարկության գաղտնիությունը խախտելը, ընտրական իրավունքի իրականացմանը խոչընդոտելը)։

Նոյեմբերի 3-ին հայտնի դարձավ, որ Առուշանյանը, ընդգրկված լինելով «Հայաստան» դաշինքի ընտրական ցուցակում, մանդատից հրաժարվելու դիմում է ներկայացրել։ Համայնքապետի խոսքով` այս փուլում իր հիմնական առաքելությունը սիրելի Գորիս համայնքի շարունակական զարգացումն ու առաջընթացն ապահովելն է։

Հոկտեմբերի 17–ին կայացած ՏԻՄ ընտրությունների արդյունքում Գորիսսում հաղթեց «Առուշ Առուշանյան» դաշինքը։