ԵՐԵՎԱՆ, 3 նոյեմբերի - Sputnik. ՀՀ Ազգային ժողովի պատգամավորները 2020թ.-ի փետրվարից ի վեր փաստացի պարգևավճարներ (աշխատավարձի 30%-ը) չեն ստանում։ Այս մասին խորհրդարանում 2022 թ.-ի պետական բյուջեի նախագծի քննարկման ժամանակ հայտարարել է «Քաղաքացիական պայմանագիր» խմբակցության պատգամավոր Գևորգ Պապոյանը պատասխանելով «Հայաստան» ընդդիմադիր դաշինքից իր գործընկեր Աղվան Վարդանյանի հարցին։
«Խորհրդարանի աշխատակազմի աշխատակիցների համար նախատեսված են պարգևավճարներ՝ նրանց ընդհանուր աշխատավարձային ֆոնդի 30 տոկոսի չափով. վարորդները, հանձնաժողովների փորձագետները, պատգամավորների օգնականները, տեխնիկական անձնակազմը կստանան դրանք, սակայն պատգամավորները, ինչպես և առաջ, չեն ստանա»,-հավելել է Պապոյանը:
Հիշեցնենք, որ այս տարի ԱԺ-ն խորհրդարանական մեծամասնության քվեարկությամբ ավելացրել է ծառայողական ծախսերի համար պատգամավորների հավելավճարները՝ 50 հազարից դարձնելով 250 հազար դրամ: Ընդ որում, պատգամավորը պարտավոր չէ հայտնել, թե արդյոք այդ միջոցներն ըստ նշանակության է օգտագործել, և պարտավոր չէ վերադարձնել չօգտագործված գումարը։
Ավելի վաղ Արարատ Միրզոյանը, որն այն ժամանակ ԱԺ խոսնակի պաշտոնն էր զբաղեցնում, հայտարարել էր, որ 2021թ.-ի առաջին կիսամյակում պատգամավորները որոշել են հրաժարվել պարգևավճարներից: «Հայաստան» և «Պատիվ ունեմ» ընդդիմադիր խմբակցությունները միջոցները փոխանցում են վիրավոր զինծառայողների վերականգնողական բարեգործական հիմնադրամին: