ԵՐԵՎԱՆ, 1 նոյեմբերի - Sputnik. Ֆրանսիայի ու Թուրքիայի նախագահներ Էմանուել Մակրոնն ու Ռեջեփ Թայիփ Էրդողանը քննարկել են Հարավային Կովկասում «վեցի հարթակը»: ՌԻԱ Նովոստիի փոխանցմամբ՝ տեղեկությունն այսօր լրագրողներին հայտնել է Թուրքիայի նախագահ Ռեջեփ Թայիփ Էրդողանը։
«Նա (ֆրանսիայի նախագահ Էմանուել Մակրոնը,–խմբ.) բարձրացրեց Հարավային Կովկասում իրավիճակի հարցը։ Մենք ասել ենք, որ... ներկայում Հարավային Կովկասում դրական քայլեր են ձեռնարկվում, ու մեր եղբայր Իլհամ Ալիևը վճռականորեն ուզում է շարունակել այդ դրական քայլերը... Ռուսաստանը, Ադրբեջանը, Թուրքիան, Իրանը, Վրաստանն ու Հայաստանը, եթե դրանք բոլորը համաձայնեն, մենք այստեղ խաղաղության հարթակ կստեղծենք», - ասել է Էրդողանը։
Ավելի վաղ ՌԴ արտգործնախարար Սերգեյ Լավրովը Իրանի գործընկերոջ Հոսեյն Ամիր Աբդոլլահիանի հետ համատեղ ասուլիսի ժամանակ հայտարարել էր, որ կողմերը քննարկել են «3+3» ձևաչափի ստեղծման հնարավորությունը։
Լավրովը նշել էր, որ Իրանը, ինչպես Թուրքիան ու Ադրբեջանը, դրական է վերաբերվում այս նախաձեռնությանը։ Նա հույս էր հայտնել, որ Վրաստանը հետաքրքրվածություն կդրսևորի խորհրդակցությունների նման մեխանիզմ ստեղծելու և Անդրկովկասի զարգացմանն ուղղված որոշումները համաձայնեցնելու հարցում։
Հոկտեմբերին Վրաստանի ԱԳՆ–ն հերքեց տեղեկությունը, թե գերատեսչության ղեկավար Դավիթ Զալկալիանին իբր հաստատել է Հայաստանի, Ադրբեջանի, Վրաստանի, Իրանի, Ռուսաստանի և Թուրքիայի մասնակցությամբ «3+3» ձևաչափի բանակցություններին վրացական կողմի մասնակցության պատրաստակամությունը։