Հայտնի է` ով է Գյումրու նոր քաղաքապետը

ԵՐԵՎԱՆ, 1 նոյեմբերի- Sputnik. Գյումրու ավագանու քվերակության արդյունքում այսօր Գյումրու նոր քաղաքապետ դարձավ «Բալասանյան դաշինքի» առաջին համարը ներկայացնող Վարդգես Սամսոնյանը։ Քվեարկությանը մասնակցել են ավագանու 32 անդամները։ Նրա թեկնածությանը կողմ են քվեարկել 24, դեմ` 8 անդամ։

Տվյալ թեկնածուին կողմ են քվերակել «Բալասանյան դաշինք» սոցիալական կուսակցության ու «Քաղաքացիական պայնագիր կուսակցության» ավագանիները, իսկ «Զարթոնքը», ՀՀԿ-ն և «Ապրելու երկիր» կուսակցության ավագանիները` դեմ։

Նշենք, որ Գյումրիի նորընտիր ավագանին առաջին նիստն էրգումարել, քննարկվում էր համայնքապետի ընտրության հարցը։

«Բալասանյան դաշինք» խմբակցության կողմից առաջադրվել էր Վարդգես Սամսոնյանի թեկնածությունը։

«Քաղաքացիական պայմանագիր» խմբակցությունը համայնքի ղեկավարի թեկնածու չէր առաջադրել։

«Զարթոնք», «Ապրելու երկիր» և «Հայաստանի Հանրապետական» խմբակցությունները քաղաքապետի թեկնածու չէին առաջադրել։

Նոր քաղաքապետի երդմնակալությունը կկայանա նոյեմբերի 4 -ին, իսկ ավագանու հաջորդ նիստը` դեկտեմբերի 3 -ին։

Հիշեցնենք, որ հոկտեմբերի 17-ին Գյումրիում տեղի ունեցած ՏԻՄ ընտրություններում անցողիկ շեմը հաղթահարել է 5 ուժ՝ «Բալասանյան» դաշինք՝ 9637 ձայն (36,59%), «Քաղաքացիական պայմանագիր» կուսակցություն՝ 7785 ձայն (29,56 %), «Զարթոնք» կուսակցություն՝ 2793 ձայն (10,60%), «Ապրելու երկիր» կուսակցություն՝ 1489 ձայն (5,65%), Հայաստանի Հանրապետական կուսակցություն՝ 1333 ձայն (5,06%):

Նրանցից որևէ մեկը միանձնյա քաղաքային իշխանություն ձևավորել չի կարող, քանի որ ստացած քվեների համաձայն` ավագանու 33 տեղերի կեսից ավելին՝ 17 մանդատ, որևէ ուժի բաժին չի հասել։

Հենց այս պատճառով էլ ՔՊ–ն և «Բալասանյան» դաշինքը հուշագիր ստորագրեցին։