Ճրագալույցը, ինչպես Սուրդ Ծննդյան, այնպես էլ՝ Զատկական, մեր եկեղեցու ամենասուրբ տոներից է, և շատ կարևոր է, որ այդ օրը մեր պետական տոնացույցում իր հատուկ տեղն ունենա որպես քրիստոնեական տոն, Sputnik Արմենիայի հետ զրույցում նման տեսակետ հայտնեց Տեր Եսայի քահանա Արթենյանը։
Ըստ քահանայի` Ճրագալույցը մեզ համար շատ կարևոր է` հաշվի առնելով այն հանգամանքը, որ մեր ժողովրդի մեծամասնությունը քրիստոնյա է, Հայ Առաքելական եկեղեցու հետևորդ, ուստի մարդիկ մասնակցում են պատարագին, Ճրագալույցին։ Մեռելոցը նույնպես չափազանց կարևոր է, որովհետև վերոհիշյալ տոների խորհրդի մեջ արտացոլված է մեր ազգային մշակույթը, մեր հոգևոր զգացումներն ու ապրումները։
«Տնտեսագետները գուցե հաշվեն, թե Մեռելոցի կամ Ճրագալույցի տոները ոչ աշխատանքային հայտարարելով` որքան ֆինանսական կորուստներ կլինեն տնտեսության մեջ, բայց կարծում եմ, որ պատշաճ վերաբերմունքը եկեղեցական մեծ տոների հանդեպ, մանավանդ եթե խոսքը Տաղավար տոնի մասին է, ոչ մի կերպ չի խանգարի տնտեսությանը»,– ասաց քահանան։
Նշենք, որ ՀՀ Ազգային ժողովը հոկտեմբերի 27-ին առաջին ընթերցմամբ ընդունեց օրինագիծ, որի համաձայն` քաղաքացիները կհանգստանան միայն դեկտեմբերի 31-ին, հունվարի 1-ին և Սուրբ Ծննդյան տոնին` հունվարի 6-ին։ Մյուս բոլոր օրերը կլինեն աշխատանքային։ Հասարակության մեջ տվյալ որոշումը միանշանակ չի ընկալվել, իսկ խորհրդարանում քննարկումներն անցել են բավականին լարված մթնոլորտում։
Մայր աթոռի եկեղեցական ժողովը դիմել է Ազգային ժողովին` առաջարկելով ոչ աշխատանքային դարձնել նաև հունվարի 5-ն ու հունվարի 7-ը։