Կարեն Տոնականյանը լքեց պայքարը բռնցքամարտի աշխարհի առաջնությունում. պատճառը վնասվածքն է

ԵՐԵՎԱՆ, 31 հոկտեմբերի – Sputnik. Սերբիայում ընթացող բռնցքամարտի աշխարհի առաջնությունում Հայաստանի ներկայացուցիչ Կարեն Տոնականյանը լքեց պայքարը:

60 կգ քաշային կարգի 1/8 եզրափակիչում Տոնականյանը մրցեց Ֆրանսիան ներկայացնող Սոֆիանե Օումիհեի հետ և երրորդ ռաունդում ձեռքի վնասվածք ստացավ, ինչի պատճառով հաղթանակը ժամանակից շուտ շնորհվեց ֆրանսիացի բռնցքամարտիկին:

Եվրոպական խաղերի բրոնզե մեդալակիրն աշխարհի առաջնությունում պայքարը սկսել էր 1/16 եզրափակիչից, որտեղ նոկաուտով հաղթել էր Մալիի ներկայացուցիչ Աբդուլ-Քարիմ Բաթիլին:

Կարեն Աղամալյանի գլխավորած թիմն աշխարհի առաջնությանը ներկայացել է 11 բռնցքամարտիկով, որոնցից պայքարը շարունակում են Արթուր Հովհաննիսյանը (51 կգ), Արթուր Բազեյանը (57 կգ), Կարեն Տոնականյանը (60 կգ), Հովհաննես Բաչկովը (63.5 կգ), Արման Դարչինյանը (71 կգ) և Դավիթ Չալոյանը (+92 կգ):

Հայաստանի 4 ներկայացուցիչներ ավելի վաղ դուրս էին մնացել պայքարից. Սեյրան Եղիկյանը (48 կգ) մեկ հաղթանակ տանելուց հետո (3:0) պարտվել է 1/8 եզրափակիչում: Գուրգեն Մադոյանը (67 կգ) ևս մեկ հաղթանակ տանելուց հետո (5:0) պարտվել է 1/16 եզրափակիչում, Համբարձում Հակոբյանը (80 կգ) և Նարեկ Մանասյանը (92 կգ) պարտվել են մեկնարկային մենամարտերում: