ԵՐԵՎԱՆ, 30 հոկտեմբերի – Sputnik. Մայր աթոռը դիմել է ՀՀ Ազգային Ժողովի խմբակցություններին, որպեսզի որպես Ամանորի ու Սուրբ ծննդյան տոների ոչ աշխատանքային օրեր պահպանեն նաև հունվարի 5-ը` որպես Սուրբ ծննդյան Ճրագալույցի տոնական օր և հունվարի 7-ը` որպես մեռելոց հիշատակի օր։ Մայր աթոռի տեղեկատվական համակարգը հաղորդագրություն է տարածել` հայտնելով, որ Ն.Ս.Օ.Տ.Տ. Գարեգին Երկրորդի նախագահությամբ Մայր աթոռում գումարվել է հայաստանյան եպիսկոպոսների և թեմակալ առաջնորդների ժողով։
«Հատկանշական է, որ շատ երկրներում (որոնց թվում են Ավստրիան, Ֆրանսիան, Գերմանիան, Ռումինիան, Լեհաստանը, Լիտվան և հարևան Վրաստանը) պետական ոչ աշխատանքային օրերի գերակշռող մասը (60-80%)՝ եկեղեցական տոներ են։ Մինչդեռ քրիստոնեությունն իբրև պետական կրոն առաջինն ընդունած Հայաստանում՝ միայն 19% է եկեղեցական»,–նշված է հաղորդագրության մեջ։
Մայր աթոռը հայտնում է, որ հունվարի 7-ը, որպես մեռելոց հիշատակի օր, անհրաժեշտ է ոչ աշխատանքային պահպանել, հատկապես, երբ արցախյան պատերազմի զոհերի ցավը դեռ մորմոքում է մեր ժողովրդի սրտում։
Միաժամանակ, Մայր աթոռը լիահույս է, որ ԱԺ–ում նկատի կունենան իրենց առաջարկները։
Նշվում է, որ ժողովին քննարկվել են նաև 44-օրյա պատերազմի հետևանքների հաղթահարման ուղղությամբ Հայ առաքելական եկեղեցու կողմից իրականացվող գործունեությունը, ռազմագերիների վերադարձման, անհետ կորածների հայտնաբերման խնդիրները, զոհվածների աճյունների նույնականացման և հուղարկավորության հետ առնչվող հարցերը:
Հիշեցնենք` ՀՀ Ազգային ժողովը հոկտեմբերի 27-ին առաջին ընթերցմամբ ընդունեց օրինագիծ, որի համաձայն` քաղաքացիները կհանգստանան միայն դեկտեմբերի 31-ին, հունվարի 1-ին, 2–ին և Սուրբ ծննդյան տոնին` հունվարի 6-ին։ Մյուս բոլոր օրերը կլինեն աշխատանքային։ Հասարակության մեջ տվյալ որոշումը միանշանակ չի ընկալվել, իսկ խորհրդարանում քննարկումներն անցել են բավականին լարված մթնոլորտում։