ԵՐԵՎԱՆ, 30 հոկտեմբերի – Sputnik. Այսօր Ռուսաստանի արտաքին գործերի նախարար Սերգեյ Լավրովն ու Թուրքիայի արտաքին գործերի նախարար Մևլութ Չավուշօղլուն անդրադարձել են Հարավային Կովկասում տնտեսական և տրանսպորտային կապերի ապաշրջափակման նպատակով «3+3» տարածաշրջանային մեխանիզմի գործարկման հեռանկարներին։ Տեղեկությունը հայտնում է Ռուսաստանի արտաքին գործերի նախարարությունը` հավելելով, որ Հռոմում «Մեծ քսանյակի» գագաթնաժողովի շրջանակներում է կայացել է երկու երկրների ԱԳ նախարարների հանդիպումը։
Նշվում է, որ քննարկվել է «3+3» ձևաչափը` փոխշահավետ ենթակառուցվածքային նախագծերի առաջխաղացման նպատակով։
Բացի այդ, զրույցի ընթացքում քննարկվել է Բալկաններում և Անդրկովկասում իրավիճակի հետագա կայունացման ուղղությամբ երկու երկրների ջանքերի համատեղման հարցերը։
Ռուսաստանի և Թուրքիայի արտաքին քաղաքական գերատեսչությունների ղեկավարներն անդրադարձել են նաև միջազգային օրակարգի մի շարք հարցերի:
Հիշեցնենք, որ «3+3» ձևաչափը առաջարկվել է Ադրբեջանի ու Թուրքիայի կողմից՝ տարածաշրջանային տնտեսական ու տրանսպորտային խնդիրները լուծելու համար։
Խմբում, ըստ առաջարկի, կներառվեն նաև Ռուսաստանը, Հայաստանը, Վրաստանը, Իրանը։
Ռուսաստանը և Իրանը հավանություն են տվել ձևաչափին, Հայաստանը և Վրաստանը դեռևս պաշտոնական արձագանք չեն տվել։
ՀՀ Անվտանգության խորհրդի քարտուղար Արմեն Գրիգորյանը հայտնել է, որ Հայաստանը դեռ դիրքորոշում չունի «3+3» ձևաչափի վերաբերյալ։