Ադրբեջանում հայերենի դասավանդումը սկսել է վաղուց, Հայաստանից Ադրբեջան տեղափոխված և հայերենին տիրապետող շատ անձինք հարևան երկրում ընդգրկված են որոշակի ոլորտներում, ինչը նույնպես բավականին լուրջ ռեսուրս է, ուստի այդ ակտիվացումը մեզ համար դրական միտումներ չունի։ Sputnik Արմենիայի հետ զրույցի ընթացքում նման կարծիք հայտնեց թուրքագետ Ռուբեն Մելքոնյանը։
«Ադրբեջանում հայագիտության զարգացումը կամ հայերեն լեզվի դասավանդման ակտիվացումը միանշանակ վարվող քաղաքականության տարրերից է, որովհետև հայերենը, հայկական մշակույթը, պատմությունը ուսումնասիրվում է ոչ թե գիտության տեսանկյունից, այլ դա դառնալու է գործիք, և այդ անձինք ընդգրկված են լինելու ընդհանուր հակահայկական քաղաքականության մեջ»,– նշեց թուրքագետը։
Անդրադառնալով այն հարցին, թե ինչ է կատարվում Հայաստանում, Մելքոնյանն ընդգծեց, որ 2000–ական թվականների երկրորդ կեսից կոնկրետ ԵՊՀ արևելագիտության ֆակուլտետում ադրբեջաներեն դասավանդվում է, ու թեև այդ քայլը մի փոքր ուշացած է, բայցևայնպես, դասավանդումն արդեն ունի տարիների պատմություն, տեղում կա նաև ադրբեջանագիտության ծրագիր, որն ընդհատվել էր 2018 թվականի իշխանափոխությունից հետո։
«Այս տարի փորձ է արվում հետզհետե վերականգնել ծրագիրը։ Մենք ուսումնասիրում ենք ոչ միայն ադրբեջաներեն լեզուն, այլև այդ երկիրը, նրա քաղաքականությունը, գրականությունը և այդ համատեսքտում պատրաստվում են մասնագետներ, որոնք քաջածանոթ են թշնամական երկրին` դրանից բխող բոլոր հետևանքներով»,– նշեց թուրքագետը։
Մելքոնյանի տեղեկացմամբ` ադրբեջաներենի ուսումնասիրության ռեսուրսներն ու միջոցները բավարար չեն, ուստի կարիք կա այդ ամենն ավելացնելու, կարիք կա պետական ուշադրության ավելացման, քանզի տվյալ հարցն ունի պետական ու ազգային անվտանգության նշանակություն։
Ըստ նրա` Հայաստանը (անկախ իշխանությունից) կարիք ունի հարևան երկրի մասին հավելյալ գիտելիքների։
Քանի որ մեր հասարակությունը նույնպես գտնվում է Ադրբեջանի թիրախում, հետևաբար պետք է ունենա իր անվտանգայրին պատկերացումները։ Մելքոնյանի կարծիքով` նույնիսկ ամենատարրական գիտելիքները թույլ կտան պատկերացնել, թե խելագարության հասնող ինչպիսի հակահայկական քաղաքականություն է վարվում այսօր Ադրբեջանում` սկսած մանկապարտեզներից, մինչև բոլոր ոլորտները։
Լեզուների համալսարանին կից գործարկվել են հատուկ դասընթացներ։
Նշվում է, որ ունկնդիրները հիմնականում պետանվտանգության ծառայության, ԱԳՆ-ի աշխատակիցներ են, սահմանապահներ և լրագրողներ:
Դասերն անվճար են միայն ուսանողների համար։
Մյուսների համար դասընթացի ամսական արժեքը տատանվում է 60-120 մանաթի սահմաններում ($35-70) ։