ԵՐԵՎԱՆ, 29 հոկտեմբերի – Sputnik. Տունը, որի նմակիչների վրա այսօր հարձակվել էին Տաշիրում, պատկանում է Օթարի Նաբոևին, որը նախկինում աշխատել է ոստիկանության Տաշիրի բաժնի պետի օպերատիվ գծով տեղակալ, կոչումով ոստիկանության փոխգնդապետ է։ Տեղեկությունը հայտնում է shamshyan.com–ը։
Արդեն հայտնել ենք, որ այսօր՝ հոկտեմբերի 29-ին, զինված ավազակային հարձակում է տեղի ունեցել Լոռու մարզում. հնչել են կրակոցներ, կան տուժածներ։
Կայքի տեղեկացմամբ` Օթարի Նաբոևն այս պահին գտնվում է Ռուսաստանի Դաշնությունում։
Տուժածները նրա կինն ու որդին են` 48-ամյա Սուսաննա Շամոյանը և 29-ամյա Խալո Նաբոևը։
Կայքի տեղեկություններով՝ ոստիկաններն ու քննիչներն արդեն պարզել են հանցագործներից մեկի ինքնությունը, որի տվյալներն այս պահն նախաքննության շահերից ելնելով՝ չեն հրապարակում։
Նա Տաշիր քաղաքի բնակիչ է՝ նախկինում գողությունների և ավազակային հարձակման համար դատապարտված։
Ըստ ՔԿ–ի` նույն օրը՝ ժամը 02։30-ին, վերջինիս մայրը ոստիկաններին հայտնել է, որ նշված օրը՝ ժամը 01։30-ի սահմաններում, երկու դիմակավորված և զինված անձ մուտք են գործել իրենց տուն, հարցրել են որդու գտնվելու վայրը և գումար ու ոսկի պահանջել: Ստանալով բացասական պատասխան՝ նրանցից մեկն ինքնաձիգի խզակոթով հարվածել է կնոջ ճակատին, իսկ մյուսը բարձրացել է երկրորդ հարկ։
Քիչ անց, երբ որդին վերադարձել է, նրանցից մեկը տան բակում կրակել է որդու ուղղությամբ՝ պատճառելով մարմնական վնասվածքներ, որից հետո ենթադրյալ հանցագործություն կատարած անձինք դիմել են փախուստի:
Դեպքի առթիվ Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 175-րդ հոդվածի 3-րդ մասի 3-րդ կետով (ավազակություն, որը կատարվել է առողջությանը ծանր վնաս պատճառելով), 34-104 հոդվածի 2-րդ մասի 8-րդ կետով (սպանության փորձ` շահադիտական դրդումներով, պատվերով, ինչպես նաև զուգորդված՝ շորթմամբ, ավազակությամբ կամ բանդիտիզմով) և 235-րդ հոդվածի 1-ին մասով (ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։