ԵՐԵՎԱՆ, 29 հոկտեմբերի – Sputnik. ՀՀ ԱԺ «Քաղաքացիական պայմանագիր» խմբակցության պատգամավոր Անդրանիկ Քոչարյանը խնդրում է չշտապել Հայաստանի տարածքից ադրբեջանցիների դուրս գալու հարցում։
«Ինչո՞ւ եք շտապում, մի՛ շտապեք, հանգիստ, այդ գործընթացը սիրում է համբերությունն ու հստակություն»,– խորհրդարանական ճեպազրույցների ժամանակ ասաց Քոչարյանը։
Անդրադառնալով Սյունիքի մարզի Սև լճի տարածքում գտնվող ադրբեջանցիների դուրս գալուն` Քոչարյանն ընդգծեց` այն, ինչը մերն է, այնտեղ օտար զինված ուժեր չեն կարող լինել։
Պատասխանելով հարցին, արդյոք ՌԴ–ն փորձո՞ւմ է Մինսկի խմբից դուրս մղել մյուս համանախագահներին, պատգամավորը շեշտեց, որ նման բան չի կարող լինել, քանի որ այն չի ձևավորվել որևէ մեկի ցանկությամբ։
Լրագրողները խնդրեցին մեկնաբանել նաև ՀՀ վարչապետ Նիկոլ Փաշինյանի և Ռուսաստանի գլխավոր շտաբի պետի տեղակալ, գեներալ-գնդապետ Սերգեյ Իստրակովի երեկվա հանդիպումը։ Քոչարյանը նշեց` շատ լավ է, որ այդ հանդիպումները կան։ Նրա խոսքով` նման հանդիպումները շարունակական են, քանի որ Հայաստանն իր ռազմավարական գործընկերոջ հետ քննարկելու շատ բաներ ունի։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզի Սև լճի տարածքում և Գեղարքունիքի մարզի Կութ, Նորաբակ ու Վերին Շորժա գյուղերի սահմանային տարածքներում ներխուժել են ՀՀ ինքնիշխան տարածք ու փորձում են ամրապնդվել այնտեղ։