ԵՐԵՎԱՆ, 28 հոկտեմբերի – Sputnik. ՀՀ ԱԺ փոխխոսնակ, ԲՏԱ նախկին նախարար Հակոբ Արշակյանը Սանկտ Պետերբուրգում մասնակցել է ԱՊՀ միջխորհրդարանական վեհաժողովի հանձնաժողովների նիստին։ Տեղեկությունը հայտնում է Ազգային ժողովի մամուլի ծառայությունը։
«Հակոբ Արշակյանն ընտրվել է Պաշտպանության և անվտանգության մշտական հանձնաժողովի նախագահի տեղակալ»,- նշված է հաղորդագրության մեջ։
ԱՊՀ միջխորհրդարանական վեհաժողովի անվտանգության ոլորտում օրենսդրության ներդաշնակեցման և նոր մարտահրավերներին ու սպառնալիքներին հակազդելու հարցերով համատեղ հանձնաժողովի և ԱՊՀ ՄԽՎ պաշտպանության եւ անվտանգության մշտական հանձնաժողովի նիստն անցկացվել է Տավրիկյան պալատում:
Նիստում քննարկվել են հանձնաժողովների կողմից մշակվող մի շարք մոդելային իրավական փաստաթղթերի նախագծեր: Նշվում է, որ հայկական կողմի ներկայացրած առաջարկների հիմնական մասն արտացոլվել է հավանության արժանացած նախագծերում:
Քննարկումների արդյունքում ներկայացված դիտողություններն ու առաջարկները կփոխանցվեն նախագծերը մշակողներին` հաջորդ նիստերում քննարկելու համար: