ԵՐԵՎԱՆ, 28 հոկտեմբերի – Sputnik. ՀՀ ազգային ժողովի փոխնախագահ Ռուբեն Ռուբինյանը վստահեցնում է, որ ՀՀ–ում մամուլն ազատ չէ։ Նա այս մասին հայտարարեց ԱԺ քառօրյայի ժամանակ, երբ քննարկվում էր «Զանգվածային լրատվության մասին» օրենքում փոփոխություններ և լրացումներ կատարելու մասին նախագիծը։
«ՀՀ–ում մամուլն ազատ չէ, բայց ի տարբերություն նախկինի, Հայաստանում մամուլը կախված է ընդդիմությունից, ոչ թե իշխանություններից։ Ի դեպ, իշխանության բարձրաստիճան պաշտոնյաներ կան, ում շատ մոտ բարեկամներն աշխատում են ընդդիմադիր թերթերում։ Սրանից ավելի ապացույցի կարիք կա՞, որ ՀՀ–ում մամուլն ազատ է»,– նշեց Ռուբինյանը։
Նա հռետորական հարց հնչեցրեց` կարելի՞ է կամ պե՞տք է այնպես անել, որպեսզի մամուլն այսօր շատ ավելի ազատ լինի ու պատասխանեց, որ միանշանակ պետք է։ ԱԺ փոխնախագահը շեշտեց, որ տվյալ նախագիծը հենց դրա մասին է։
Նշենք, որ «Զանգվածային լրատվության մասին» ՀՀ օրենքում փոփոխություններ և լրացումներ կատարելու նախագիծը հեղինակել են ԱԺ «Իմ քայլը» խմբակցության պատգամավորներ Արթուր Հովհաննիսյանը, Վահագն Հովակիմյանը, Թագուհի Ղազարյանն ու Սարգիս Խանդանյանը։ Նրանք նախկինում լրագրողներ են եղել։
Նախագծով առաջարկում են օրենքում նոր հասկացություն ներմուծել՝ «չնույնականացված աղբյուրներ»։ Առաջարկվում է նաև ևս մի փոփոխություն կատարել՝ պետական մարմիններում թույլ չտալ հավատարմագրվել այն լրատվամիջոցներին, որոնք չեն ներկայացնի նույնականացման տվյալներ և ֆինանսական տարեկան հաշվետվություն։