ԵՐԵՎԱՆ, 28 հոկտեմբերի – Sputnik. ՀՀ կառավարությունն այսօր հավանություն տվեց նախագծին, որով առաջարկվում էր «Երևանի ավտոբուս» ընկերության և «Վերակառուցման ու զարգացման եվրոպական բանկի» միջև «Երևանի ավտոբուսների ծրագիր» դրամաշնորհային համաձայնագիր ստորագրել։
Տարածքային կառավարման և ենթակառուցվածքների նախարար Գնել Սանոսյանը հայտնեց` «Դաբլյու Վայ Ջի Ինթերնեյշնլ Լիմիթիդ» խորհրդատվական ընկերությանն առաջարկվել էր ուսումնասիրել ՀՀ տրանսպորտային ցանցը, որի արդյունքում մշակվել է նոր տրանսպորտային ծրագիր։
«Առաջարկվել է 845 տարբեր չափի ավտոբուսներ գնել, որպեսզի կարողանանք սպասարկել ողջ մայրաքաղաքին։ Ընդհանուր առմամբ, անհրաժեշտ կլինի 120-150 մլն եվրո»,–ասաց Սանոսյանը։
Նրա խոսքով` առաջին փուլում ձեռք կբերվեն 12 մետրանոց 100 ցածրահասակ ավտոբուսներ. առաջին փուլի ֆինանսավորման համար 25 մլն եվրո է տրամադրվելու, որից 20 մլն եվրո վարկ ՎԶԵԲ-ից և 5 մլն եվրո դրամաշնորհ Արևելյան Եվրոպայի էներգախնայողության և շրջակա միջավայրի գործընկերության կողմից:
Վարչապետ Նիկոլ Փաշինյանն էլ նշեց, որ այդ ավտոբուսների շահագործման ժամկետը 10 տարի է, և դրանից հետո այդ ավտոբուսային պարկը թարմացնելու կարիք կլինի։ Նրա խոսքով` այս դեպքում պետք է որոշակի այլ լուծումներ էլ լինեն, քանի որ 10 տարի հետո նորից պետք է պարտք վերցնենք կամ էլ վերադառնանք «Գազել»-ների տրամաբանությանը։ Վարչապետը վստահեցրեց` «Գազել»-ների տրամաբանությանը վերադարձ չի լինելու։
Փոխվարչապետ Մհեր Գրիգորյանն էլ իր հերթին նշեց, որ հաշվարկված քայլերի շնորհիվ կարող են վերջնական լուծել տրանսպորտի հարցը նախ Երևանում, իսկ հետո այդ փորձը տանել նաև Սյունիք։
Հիշեցնենք, որ Երևանի քաղաքապետարանը հայտնել էր` Չինաստանից գնված 211 ավտոբուսներն արդեն Հայաստանում են։