ԵՐԵՎԱՆ, 27 հոկտեմբերի – Sputnik. «Հայաստան» դաշինքը հրաժարվում է Արցախի թեմայով փակ հանդիպման գնալ վարչապետ Նիկոլ Փաշինյանի հետ։ Նման հայտարարություն է տարածել դաշինքը` պատասխանելով այսօր ԱԺ–ում կառավարության հետ հարցուպատասխանի ժամանակ վարչապետի արած առաջարկությանը։
Հայտնել էինք, որ այսօր ԱԺ–ում Փաշինյանն ընդդիմադիրներին Արցախի հարցով հանդիպման էր հրավիրել։
«Հայաստան» դաշինքը հայտարարում է, որ Փաշինյանի հետ քննարկման օրակարգը կարող է լինել միայն իր հրաժարականը։
«ՀՀ ինքնիշխանությունն ու անվտանգությունը սպառնալիքի տակ դրած, Արցախի զգալի մասը դավադիր պատերազմում թշնամուն հանձնած, թշնամիներին՝ կառուցողական, իսկ սեփական հայրենակիցներին՝ շինծու գործերով կալանավորումների հրահանգներ տված, սևերի ու սպիտակների բաժանած անձնավորության հետ չի կարող լինել որեւէ փակ քննարկում՝ որեւէ ֆորմատով: Ի վերջո, ցանկանան, թե՝ ոչ, պետք է հաշվետու լինեն հանրության առջև»,–նշված է «Հայաստան» դաշինքի հայտարարության մեջ։
Դաշինքը վերահաստատում է, որ «մեկ սանտիմետր անգամ» չեն հրաժարվել իշխանություններին հեռացնելու իրենց նպատակից և միայն այդ օրակարգով կարող է լինել քննարկում «վարչապետի պաշտոնը ժամանակավորապես զբաղեցնողի հետ»:
Հիշեցնենք, որ ԱԺ «Պատիվ ունեմ» խմբակցությունը նույնպես մերժել էր Փաշինյանի հրավերը. պատգամավոր Հայկ Մամիջանյանն ԱԺ նիստի ժամանակ հայտարարել էր` խմբակցությունը Փաշինյանի հրավերով կարող է քննարկել միայն նրա հրաժարականի տեքստը։