ԵՐԵՎԱՆ, 27 հոկտեմբերի - Sputnik. Հայաստանում համընդհանուր հարկային հայտարարագրերը 2022 թվականին ուժի մեջ չեն մտնի։ Տեղեկությունը Sputnik Արմենիայի հետ զրույցում հայտնեց ՀՀ ֆինանսների նախարար Տիգրան Խաչատրյանը։
Նրա խոսքով՝ օրինագիծն օրակարգից դուրս չի բերվել, ավելին՝ կառավարությունը մտադիր է վաղ թե ուշ հարկային հայտարարագրերը տարածել բոլոր քաղաքացիների վրա։ Նախարարն ավելացրեց, որ պարզապես քննարկումները դանդաղել են, քանի որ դեռ մի շարք հարցեր պետք է լուծվեն:
«Նախ պետք է հասկանալ, թե դրանից ինչ լրացուցիչ հարկային մուտքեր կստանա պետությունը, երկրորդը՝ ինչ կստանա հարկատուն։ Տարբերակներից մեկը կրթության, առողջապահության կամ այլ ծառայությունների համար հարկային վարկերն են», - նշեց Խաչատրյանը։
Բոլոր քննարկումները հաջորդ տարի կշարունակվեն ։ Այսպիսով, 2022-ին հայտարարագրերի համակարգը դեռ չի գործելու, բայց մեկ տարվա ընթացքում հարցը կքննարկվի, երբ 2022-ի կեսերին կառավարությունը քննարկի 2023-26 թվականների միջնաժամկետ ծախսերի ծրագիրը:
Նշենք, որ համընդհանուր հարկային հայտարարագրերի համակարգը քննարկվել է դեռևս 2015 թվականին՝ հարկային օրենսգրքի կազմման վաղ փուլերում։
Ընդհանուր հարկային հաշվետվությունների հետ մեկտեղ, այն ժամանակ առաջարկվում էր նաև կրթության (օրինակ` բուհերում ուսման վարձի) և առողջապահության ԱԱՀ սահմանել, բայց այն պայմանով, որ սոցիալապես անապահով քաղաքացիներն ազատվեն ԱԱՀ-ից (ունեցվածքի մակարդակը կարելի էր որոշել հարկային հայտարարագրերով):
Այսպիսով, ԱԱՀ-ի արտոնությունը պետք է նպատակային լիներ։ Բայց այն ժամանակ որոշեցին հրաժարվել այդ գաղափարից։