ԵՐԵՎԱՆ, 27 հոկտեմբերի – Sputnik. Պրոֆեսոր, պատգամավոր Արմեն Չարչյանի առողջական վիճակի, կալանքի համար ուղիղ պատասխանատվություն են կրում ոչ միայն իրավապահները, այլ նաև ՀՀ առողջապահության նախարար Անահիտ Ավանեսյանը։ ԱԺ–ում լրագրողների հետ ճեպազրույցում նման կարծիք հայտնեց «Հայաստան» խմբակցության պատգամավոր Արամ Վարդևանյանը։
«Հարցն այն է, որ դատարանի կողմից մոտ մեկ ամիս առաջ գրություն է հասցեագրվել առողջապահության նախարարին` պարզելու Չարչյանի առողջական վիճակի համատեղելիությունը կալանքի հետ։ Նախարարն այդպես էլ չի պատասխանել այդ գրությանը։ Մասնագիտական տեսանկյունից սա ոչ միայն խայտառակություն է, այլև լկտի վարքագիծ է պաշտոնի նկատմամբ»,–ասաց Վարդևանյանը` հավելելով, որ նախարարն անգործության է մատնում այս հարցը։
Նա նշեց` Չարչյանի արյան մեջ գլյուկոզայի մակարդակը շատ բարձր է և պարզից էլ պարզ է, որ նրա առողջական վիճակն անհամատեղելի է կալանքի հետ։
Վարդևանյանի խոսքով` պատգամավորի անձեռնմխելիությունը խախտելու վերաբերյալ ՍԴ–ում մուտքագրված դիմումը կքննվի դեկտեմբերի 6–ին և հնարավոր է` հենց այդ օրն էլ որոշում կայացվի։
Պատգամավորը հայտնեց նաև, որ ՔԿՀ–ն չունի այն միջոցները, որոնցով հնարավոր կլինի այնպես անել, որ Չարչյանի առողջական վիճակն ավելի չվատանա։Արմեն Չարչյանի կյանքին որևէ վտանգ չի սպառնում. նախարար
Հիշեցնենք` հունիսի 18-ին համացանցում հայտնվեց մի ձայնագրություն, որում լսվում էր, թե ինչպես է Չարչյանը աշխատակիցներին հորդորում ԱԺ ընտրությանը մասնակցել` ակնարկելով չքվեարկել գործող իշխանությունների օգտին։ Նույն օրը Չարչյանը ձերբակալվեց։
Հունիսի 21-ին Կենտրոնական ընտրական հանձնաժողովը թույլ տվեց քրեական հետապնդում սկսել Չարչյանի նկատմամբ։ Չարչյանը կալանավորվեց, ապա 15 մլն գրավի դիմաց ազատ արձակվեց։
Օգոստոսի 23-ին Չարչյանը կրկին կալանավորվեց։