ԵՐԵՎԱՆ, 26 հոկտեմբերի – Sputnik. ՀՀ Սյունիքի մարզի Սիսիանի նախկին համայնքապետ, այժմ ԱԺ «Հայաստան» խմբակցության պատգամավոր Արթուր Սարգսյանը ձերբակալությունից հետո առաջին անգամ խոսել է լրագրողների հետ:
Գրավի դիմաց ազատ արձակված քաղաքական գործիչը չի խոսել քրեական գործի մասին ՝ հայտարարելով, որ հետաքննությունը դեռ շարունակվում է, և ինքը չի կարող մեկնաբանել գործընթացը:
Սարգսյանն անդրադարձել է սահմանին անվտանգության խնդիրներին, որոնց բախվում են սիսիանցիներն ու Սյունիքի մարզի բոլոր բնակիչները։ Ինքը՝ Սարգսյանը, մինչև ձերբակալվելը մայիս-հունիս ամիսներին եղել է Իշխանասարի դիրքերում, որտեղ նրանց դիմաց տեղակայվել են ադրբեջանցի զինվորականները, այնուհետև ներթափանցել Հայաստանի ինքնիշխան տարածք։
«Այս պահին թուրքը գտնվում է Սիսիանի վարչական տարածքում` Իշխանասարի հատվածում»,–ասաց Սարգսյանը։
Նա հիշեց, թե ինչպես է ՀՀ պաշտպանության նախկին նախարար Վաղարշակ Հարությունյանը դեկտեմբերի 17–ին գնացել Գորիս, համայնքի ղեկավարներին հավաքել ու հայտարարել, որ մինչև հաջորդ օրվա ժամը 5–ը բոլորը դիրքերից պետք է իջնեն։
«Այդ ժամանակ մեզ մոտ մտահոգություն առաջացավ, քանի որ բոլոր բարձրաստիճան պաշտոնյաները հայտարարել էին, որ երկու կողմից էլ, ով որտեղ կանգնած է, պետք է մնա այդտեղ։ Բացի այդ, 2020 թվականի նոյեմբերի 9–ի հայտարարության մեջ ոչ մի տեղ նշված չէր, որ մենք պետք է իջնենք մեր դիրքերից։ Պաշտպանության նախարարին ինչ հարց տալիս էինք, ասում էր` ես տեղյակ չեմ, միայն հրամայում էր, որ հաջորդ օրը բոլորս իջնենք Սյունիքի դիրքերից։ Ես էլ հարց տվեցի, ասացի` պարո՛ն նախարար, եթե դուք ոչնչից տեղյակ չեք, կարո՞ղ էЧ մեկ ամիս հետո գաք–ասեք` Սիսիանն էլ է տված թուրքին, եկեք հետ գնացեք»,–ասաց Սարգսյանը։
Նրա խոսքով` այդ է եղել պատճառը, որ իրենք համայնքի ղեկավարներով, առանց որևէ քաղաքական դրդապատճառի, դեմ են եղել այս իշխանություններին։
«Այդ հրամանից հետո մենք էական զիջումներ ունեցանք, մոտ 20 կմ Գորիսի և Կապանի հատվածում»,–ասաց Սարգսյանը։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզի Սև լճի տարածքում և Գեղարքունիքի մարզի Կութ, Նորաբակ ու Վերին Շորժա գյուղերի սահմանային տարածքներում ներխուժել են ՀՀ ինքնիշխան տարածք ու փորձում են ամրապնդվել այնտեղ։
Հայաստանի ռազմաքաղաքական ղեկավարությունը պարպերաբար հայտարարություններ են անում այն մասին, թե ամեն ինչ անում են հարցը խաղաղ ճանապարհով լուծելու համար։