ԵՐԵՎԱՆ, 26 հոկտեմբերի – Sputnik. Հայաստանի Հանրապետության նախագահ Արմեն Սարգսյանը պատմական այց է կատարել Սաուդյան Արաբիա։
Տեղեկությունը հայտնում են ՀՀ նախագահի աշխատակազմից և հավելում, որ հոկտեմբերի 26-ը հայ-արաբական հարաբերությունների պատմության մեջ առանձնահատուկ օր կդառնա։
«Հայաստանի անկախությունից ի վեր Հայաստանի Հանրապետության և Սաուդյան Արաբիայի միջև դիվանագիտական հարաբերությունների բացակայության պայմաններում, երբ Հայաստանից որևէ պաշտոնյա երբևէ չէր այցելել այդ երկիր, Հայաստանի նախագահը կատարեց պատմական քայլ»,– նշում են նախագահականից։
Սաուդյան Արաբիայի մայրաքաղաքի օդանավակայանում Հայաստանի նախագահ Արմեն Սարգսյանին դիմավորել են պետական ամենաբարձր մակարդակով՝ ի դեմ Սաուդյան Արաբիայի արտաքին գործերի պետնախարար Ադել ալ-Ջուբեյրի, իսկ պաշտոնական արարողակարգի համաձայն՝ օդանավակայանում բարձրացվել էր Հայաստանի Հանրապետության պետական դրոշը: