ԵՐԵՎԱՆ, 25 հոկտեմբերի – Sputnik. 2022-ին ՀՀ արտաքին պարտքի մարման և սպասարկման համար կպահանջվի 517 մլրդ դրամ։ 2022-ի բյուջեի նախնական քննարկման ժամանակ այս մասին հայտարարեց ֆինանսների նախարար Տիգրան Խաչատրյանը։
«Կուտակային պարտքը 2022-ին կհասնի 4 տրիլիոն 740 միլիարդ դրամի։ Ունենք զգալի արտաքին պարտք` 2022-ի ավարտին արտաքին պարտքը կկազմի ընդհանուր պարտքի 69 տոկոսը։ Մենք ձգտում ենք ներքին պարտքի ավելացման հաշվին կառուցվածք փոխել, ուստի հաջորդ տարեվերջին 31 տոկոս ներքին պարտք կունենանք»,–ասաց Խաչատրյանը։
Նրա խոսքով` դրամով և արտարժույթով պարտքի կառուցվածքում զգալի փոփոխություն կա. Եթե 2020-ին պարտքի 76 տոկոսն արտարժութային էր, իսկ 30 տոկոսը` դրամով, ապա հաջորդ տարվա ավարտին 70/30 հարաբերակցությունը կունենանք։
Խաչատրյանը հավելեց` արտաքին պարտքի առաջիկա խոշոր մարումները կլինեն 2025, 2029 և 2030 թվականներին` պայմանավորված արտարժույթով թողարկված պարտատոմսերի մարման հետ։