ԵՐԵՎԱՆ, 23 հոկտեմբերի – Sputnik. ՀՀ բնապահպանության և ընդերքի տեսչական մարմինը տեղում կկասեցնի բնությանը վնաս հասցնողների գործունեությունը։ Տեղեկությունը հայտնում է ՀՀ շրջակա միջավայրի նախարարությունը։
«Ոչ միայն հակահամաճարակային կանոնների, այլև բնապահպանական նորմերի պահպանմանն այսուհետ առավել խստությամբ կհետևեն տեսուչները։ Հոկտեմբերի 17-ից ՀՀ բնապահպանության և ընդերքի տեսչական մարմինն իրավունք ունի տեղում կասեցնելու տնտեսվարողի գործունեությունը, որն էական վնաս է հասցնում շրջակա միջավայրին»,- նշված է գերատեսչության հաղորդագրության մեջ։
Այժմ տեսուչները կկարողանան տեղում կասեցնել գործունեությունը, եթե ստուգվող կազմակերպությունն առանց թույլտվության ջուր կամ ընդերք օգտագործի, սիրողական կամ արդյունագործական որս անի։ Օրենքի փոփոխությունից հետո ամրագրվել է 12 նմանատիպ կետ։
ԱԺ-ն բնությանը վնաս հասցնող տնտեսվարողների գործունեությունը կասեցնելու վերաբերյալ օրենքում փոփոխությունները դեռ 1 տարի առաջ էր ընդունել, սակայն այն ամբողջությամբ ուժի մեջ է մտել հոկտեմբերի 17-ից։
2020 թվականի սեպտեմբերի 15-ին ԱԺ նիստի ժամանակ տեսչական մարմինների աշխատանքի համակարգման գրասենյակի ղեկավար Արթուր Ասոյանը նշել էր, որ կասեցումները կիրառելու են օրենքի ուժի մեջ մտնելուց հետո գործունեություն սկսող բոլոր տնտեսվարող սուբյեկտների վրա։ Նա նաև շեշտել էր, որ այն տնտեսվարող սուբյեկտները, որոնք արդեն իսկ գործունեություն են ծավալել ու ծավալում, նրանց վրա օրենքի գործողությունները տարածվելու են 1 տարի հետո։