ԵՐԵՎԱՆ, 22 հոկտեմբերի – Sputnik. Գեղամա լեռնաշղթայի Կարմիր Կատար (Թառ) լեռը ներառվել է բնության հուշարձանների ցանկում։ Տեղեկությունը հայտնում է ՀՀ շրջակա միջավայրի նախարարությունը։
Նախագիծը իրավական ակտերի նախագծերի հրապարակման միասնական կայքում (e-draft.am) ներկայացվել էր ամիսներ առաջ:
«Կարմիր Կատար հրաբուխը հանդիսանում է մոնոգեն հրաբխականության յուրահատուկ արտահայտություն, ունի գիտաճանաչողական և ռեկրեացիոն մեծ նշանակություն։ Գտնվելով Գեղարքունիքի մարզի, Գեղամա լեռնաշղթայի կենտրոնական-ջրբաժանային հատվածում, Աժդահակ հրաբխից հարավ-արևմուտք՝ այն իրենից ներկայացնում է խարամալավային կոն` 3530 մ բացարձակ բարձրությամբ, իսկ գագաթային հատվածում ունի 300 մ տրամագծով խառնարան, որտեղ առկա է խառնարանային լիճ»,- նշում են գերատեսչությունից:
Լեռն ունի նաև զբոսաշրջային մեծ նշանակություն և համարվում է բազմաթիվ լեռնագնացների ու էկոզբոսաշրջության սիրահարների սիրելի վայրը։
Նախագծի ընդունմամբ հնարավորություն է ընձեռվում ապահովել որպես բնության հատուկ պահպանվող տարածքի՝ բնության հուշարձանի պահպանությունը, պաշտպանությունն ու իրավական կարգավիճակը։
Այսպիսով, առավել մեծ ուշադրություն կդարձվի նաև արտաքին գեղագիտական և երկրաբանական անխաթար տեսքին և կդիտարկվի որպես երկրաբանական արժեքավոր տարածք։