Կարտոֆիլի թանկացման հիմնական պատճառը բնակլիմայական պայմաններն են։ Sputnik Արմենիայի հետ զրույցում ասաց գյուղատնտեսության նախկին փոխնախարար Գառնիկ Պետրոսյանը։
«Մայիսի կեսերից սկսած` տևական ժամանակ տեղումներ չգրանցվեցին, որն իր բացասական հետևանքներն ունեցավ գյուղատնտեսական մշակաբույսերի աճի ու զարգացման ընթացքի վրա։ Շատ լուրջ տուժեցին կարտոֆիլի ցանքերը»,- ասաց նա։
Նրա խոսքով` կլիմայական պայմանների հետ մեկտեղ բավականին խոչընդոտներ, ընդհատումներ կային ոռոգման ջրի մատակարարման հարցում։ Պետրոսյանը Շիրակի մարզում բազմակի դեպքեր է արձանագրել, երբ ջրամբարի մոտ գտնվող հողատարածքներում ոռոգման խնդիրներ են առաջացել։ Հուլիս-օգոստոս ամիսներին նմանատիպ խնդիրներ են եղել նաև Լոռու, Շիրակի, Գեղարքունիքի մարզերում։
«Կարտոֆիլի գների վրա ազդում է նաև արտահանումների աննախադեպ ծավալը։ Ոչ պաշտոնական տվյալներով` գարնան ամիսներին շուրջ 10.000 տոննա կարտոֆիլ է արտահանվել, հիմա արդեն, դարձյալ ոչ պաշտոնական տվյալներով` շուրջ 40.000 տոննա»,- նշեց Պետրոսյանը։
Նախկին փոխնախարարը կողմ է արտահանման ծավալների աճին. տարիներ շարունակ կարտոֆիլի ավելցուկի պատճառով շուկայում լճացում է եղել, և կարտոֆիլագործները մշտապես տուժել են։
Բնակլիմայական պայմանների ճիշտ գնահատման և մասնագիտական խորհրդատվության դեպքում հնարավոր էր կարտոֆիլի ավելի լավ բերք ունենալ։ Նախկինում այդ խորհրդատվությունն ապահովել են գյուղատնտեսության նախարարությունն ու խորհրդատվական ծառայությունները, որոնցից առաջինն այս կառավարությունը լուծարեց, երկրորդների մի մասն էլ արժանացան նույն ճակատագրին կամ աշխատաոճն ու աշխատանքային պայմանները փոխեցին, ինչը ևս իր հետևանքները թողեց կարտոֆիլագործության և առհասարակ գյուղմթերքների բերքատվության վրա։