ԵՐԵՎԱՆ, 21 հոկտեմբերի - Sputnik. ՀՀ Անվտանգության խորհրդի քարտուղար Արմեն Գրիգորյանը rusarm.info-ի հետ հարցազրույցում հայտնել է, որ Հայաստանը դեռ դիրքորոշում չունի «3+3» ձևաչափի վերաբերյալ։
«Ձևաչափը դեռ հստակեցված չէ, երբ ավելի հստակ լինի, մենք մեր դիրքորոշումը կհայտնենք։ Բնականաբար, մենք քննարկում ենք այն, որոշ դիրքորոշումներ ներկայացրել ենք մեր գործընկերներին, և նրանք ըմբռնումով են մոտենում մեզ», - ասել է Գրիգորյանը։
«3+3» ձևաչափը առաջարկվել է Ադրբեջանի ու Թուրքիայի կողմից՝ տարածաշրջանային տնտեսական ու տրանսպորտային խնդիրները լուծելու համար։ Խմբում ըստ առաջարկի կներառվեն նաև Ռուսաստանը, Հայաստանը, Վրաստանը, Իրանը։ Ռուսաստանը և Իրանը հավանություն են տվել ձևաչափին, Հայաստանը և Վրաստանը դեռևս պաշտոնական արձագանք չեն տվել։