ԵՐԵՎԱՆ, 20 հոկտեմբերի – Sputnik. Հանրային ծառայությունները կարգավորող հանձնաժողովի նախագահ Գարեգին Բաղրամյանն այսօր լրագրողների հետ ճեպազրույցում տեղեկացրեց, որ ջրի սակագնի փոփոխության հարցը մինչև դեկտեմբեր կորոշվի։ Նրա խոսքով` «Վեոլիա ջուր» ընկերության` ջրի սակագնի վերանայման հայտը քննարկելու նպատակով հանձնաժողովը նիստ կգումարի նոյեմբերի վերջին` մինչև դեկտեմբեր։
Սեպտեմբերի 29-ին «Վեոլիա ջուր» ՓԲԸ-ն դիմել էր Հանրային ծառայությունները կարգավորող հանձնաժողովին՝ ջրի սակագինը ավելի քան 40 դրամով թանկացնելու հայտով. 1 խ/մ-ի գինը ներկայիս 180 դրամի փոխարեն առաջարկելով սահմանել շուրջ 223 դրամ։
«Իրենք ամեն տարի, համաձայն վարձակալության պայմանագրի, պարտավոր են ներկայացնել սակագնի վերանայման հայտ` հաշվի առնելով այդ տարվա համար նախատեսված բազիսային գինը, սղաճի տեմպը, էլեկտրաէներգիայի փոփոխության և ջրի ծավալների փոփոխության դեպքերը»,– ասաց Բաղրամյանը։
Նա նաև տեղեկացրեց, որ սոցիալապես անապահով խավերին թանկացումներից զերծ պահելու համար ՀԾԿՀ–ն առաջարկում է առանձնացնել սոցիալապես անապահով շահառուների խումբը և նրանց սպառած ջրի սակագնի հաշվարկի չափով ամեն տարի նվազեցնել «Վեոլիա ջրի» վարձակալության պայմանագրի տվյալ տարվա գումարը։
«Սոցիալապես անապահով սպառողների խումբը շուրջ 100 000 բաժանորդ է։ Իրենց սակագներն ընդհանրապես չփոխենք, կայուն պահենք գործող գները։ Իսկ մնացած սպառողների համար բյուջեի գումարների հաշվին գնի զսպում չիրականացնենք։ Մեր առաջարկը սա է»,– ասաց հանձնաժողովի նախագահը։
Եթե ՀԾԿՀ–ի առաջարկն ընդունվի, անապահով սպառողների ջրի սակագինը կմնա 180 դրամ, մնացած սպառողներինը` շուրջ 200։
«Վեոլիա ջուր» ընկերության հայտը հաստատվելու պարագայում նոր սակագինը կսկսի գործել 2022 թվականի հունվարի 1-ից։