ԵՐԵՎԱՆ, 20 հոկտեմբերի – Sputnik. Պետական կառույցների ծառայողական մեքենաները էլեկտրականներով փոխարինելու ծրագրի շրջանակում ձեռք կբերվի էլեկտրական շարժիչով 12 մեքենա։ Տեղեկությունը հայտնում է ՀՀ շրջակա միջավայրի նախարարությունը։
«Մեքենաների պահպանման, շահագործման և վառելիքի ծախսը կրճատելու նպատակով աստիճանաբար անցում կկատարվի էլեկտրական մեքենաների շահագործմանը։ Ծրագրի շրջանակում նաև կկառուցվի էլեկտրամեքենաների համար նախատեսված էլեկտրական սնուցման 2 կայան»,- նշված է հաղորդագրության մեջ։
Ծրագրի ընդհանուր բյուջեն մոտ 5 մլն 400 հազար դոլար է, որից 4.5 միլիոնը կառավարությունը ծրագրում է ներդնել հարկային և մաքսային արտոնությունների տեսքով:
Շրջակա միջավայրի նախարարությունը պետական կառույցների ծառայողական մեքենաները նախատեսում է էլեկտրականներով փոխարինել Գլոբալ էկոլոգիական հիմնադրամի աջակցությամբ:
2018 թվականից մինչ օրս վարչապետի աշխատակազմը, Ազգային ժողովն ու նախարարությունները միասին կրճատել են 172 մեքենա: