ԵՐԵՎԱՆ, 20 հոկտեմբերի - Sputnik. Կոնֆերենցիաների Լիգայի «Ալաշկերտ»-ԼԱՍԿ հանդիպմանը կարմիր քարտի պատճառով խաղը բաց թողնող կիսապաշտպան Արտակ Գրիգորյանին կփոխարինի կիսապաշտպան Ռումյան Հովսեփյանը։ Տեղեկությունը նախախաղային ասուլիսի ժամանակ հայտնել է «Ալաշկերտ» թիմի գլխավոր մարզիչ Միլան Միլանովիչը։
«Կարծում եմ` Ռումյան Հովսեփյանը բոլոր անհրաժեշտ որակներն ունի, որ եվրագավաթային խաղերում օգնի թիմին»,–ասել է մարզիչը։
Նա նշել է, որ իր գլխավոր նպատակը ստեղծված դժվարին վիճակից թիմը դուրս բերելն է։ Մասնավորապես, հոգեբանական առումով աշխատանքներ ունեն անելու, իսկ ֆիզիկական պատրաստվածության առումով առաջընթաց կա։
«Մարզումների ու խաղերի ընթացքում տեսնում եմ, թե թիմն ինչ ներուժ ունի, ինչ որակյալ խաղացողներ։ Պիտի ջանասիրաբար աշխատանքով ձգտենք շտկել առաջնությունում իրավիճակն ու միավորներ վաստակել եվրագավաթներում։ Հոգաբանական տեսանկյունից հաղթանակ է պետք, ինչը կլավացնի թիմի մթնոլորտը։ Կփորձենք վաղը հաղթել»,–ասել է նա։
Միլանովիչն անդրադարձել է նաև ԼԱՍԿ-ի հնարավորություններին, նշելով, որ մրցակիցը բավականին ուժեղ է և մեծ ներուժ ունի, մասնավորապես, լավ եզրային խաղացողներ։
Նշենք, որ վաղը՝ հոկտեմբերի 21-ին, «Ալաշկերտը» կընդունի ավստրիական ԼԱՍԿ-ին: