ԵՐԵՎԱՆ, 19 հոկտեմբերի - Sputnik. Հոկտեմբերի 19-ի ժամը 13։30-ի դրությամբ թիվ 34 ընտրատարածքային ընտրական հանձնաժողովը դիմում-բողոքներ է ստացել ընտրության արդյունքների վերահաշվարկի վերաբերյալ։ Տեղեկությունը Sputnik Արմենիայի հետ զրույցում հայտնեց ԿԸՀ նախագահի տեղակալ Արմեն Սմբատյանը։
«Ժամը 14։00-ից սկսվել է վերահաշվարկի գործընթացը։ Մոտ 10-ը տեղամասի վերաբերյալ են դիմումները, թե որքան կտևի՝ կախված է ընտրատարածքային ընտրական հանձնաժողովի աշխատանքից»,- ասաց նա։
Նրա խոսքով` հավանաբար հանձնաժողովի անդամները չեն հասցնի մինչև օրվա վերջ ավարտել վերահաշվարկի գործընթացը։ Ընտրական օրենսգրքով վերահաշվարկի համար հնգօրյա ժամկետ է սահմանված։ Թե որ քաղաքական ուժերի կողմից են ստացվել դիմում բողոքները՝ Սմբատյանը տեղեկություն չուներ։
«Սուբյեկտները չեմ կարող նշել, որովհետև չենք հավաքել նման տեղեկատվություն, ըստ էության մեզ համար մեծ նշանակություն էլ չունի, թե ովքեր են դիմումատուները։ Այդ տեղեկատվությունն էլ ուղղակի հավաքել ենք, որ հանրությանը ներկայացնենք, որ կան այդպիսի դիմումներ, և այնտեղ կսկսվեն վերահաշվարկի գործընթացներ՝ ովքեր ցանկություն ունեն հետևելու` գնան, հետևեն»,- նշեց Սմբատյանը։
Ավելի ուշ Կենտրոնական ընտրական հանձնաժողովը հայտարարեց, որ բացի Գորիսից, ՏԻՄ ընտրությունների վերահաշվարկի դիմումներ են ներկայացվել նաև Սյունիքի մարզի Տաթև համայնքի 6 տեղամասերից։ Իսկ Տեղ համայնքի 2 տեղամասերում Տարածքային ընտրական հանձնաժողովը որոշում է կայացրել վերահաշվարկ իրականացնել սեփական նախաձեռնությամբ։
ԿԸՀ–ն նաև հայտնում է, որ քվեարկության արդյունքներն անվավեր ճանաչելու մասին դիմումներ տարածքային ընտրական հանձնաժողովները չեն ստացել:
Այսպիսով, փաստորեն հոկտեմբերի 17-ին անցկացված ՏԻՄ ընտրությունների արդյունքները կվերահաշվարկվեն միայն Սյունիքի մարզում։ Նշենք, որ ՏԻՄ ընտրությունների քվեարկության արդյունքների բողոքարկման դիմումների ընդունման ժամկետն ավարտվել է այսօր` հոկտեմբերի 19-ին, ժամը 11.00-ին: