ԵՐԵՎԱՆ, 17 հոկտեմբերի – Sputnik. Սյունիքում ՏԻՄ ընտրություններն իրենց հունով ընթանում են, ոչ մի արտառոց դեպք չի գրանցվել։ Sputnik Արմենիայի հետ զրույցում այս մասին հավաստիացրեց ՀՀ Սյունիքի մարզպետ Մելիքսեթ Պողոսյանը
Հարցին, թե Պողոսյանն ի՞նչ է ակնկալում ընտրությունների արդյունքներից, մարզպետը չպատասխանեց` նշելով, որ «ժողովուրդն ինքը կորոշի»։
«Կարևորը` ոչ մի լարվածություն չկա։ Մարդիկ գնում են, գիտակցաբար իրենց ընտրությունը կատարում։ Արտառոց դեպքեր չեն գրանցվել»,–ասաց Պողոսյանը։
Նա ընտրողների ակտիվությունը գնահատեց բավարար։
Նշենք, որ Սյունիքի մարզի Գորիս համայնքի ՏԻՄ ընտրություններին համամասնական ընտրակարգով մասնակցում են «Առուշ Առուշանյան» դաշինքը, «Հայ ազգային կոնգրես» և «Քաղաքացիական պայմանագիր» կուսակցությունները։
Մեղրիի ընտրություններին իրենց թեկնածուներին են առաջադրել Ազատական կուսակցությունը, «Ապրելու երկիր» կուսակցությունը, «Հանրապետություն» և «Քաղաքացիական պայմանագիր» կուսակցությունները։
Սյունիքի մեկ այլ՝ Տաթև համայնքում, համամասնական ընտրությունը կկատարվի «Ապրելու երկիր» կուսակցության, «Շանթ դաշինք» ազգայնական կուսակցության և «Քաղաքացիական պայմանագիր» կուսակցության միջև։
Իսկ Տեղ համայնքի համամասնական ընտրություններում պայքարի մեջ են «Ապրելու երկիր» և «Քաղաքացիական պայմանագիր» կուսակցությունները։
Հիշեցնենք` այսօր ՏԻՄ ընտրություններ են անցկացվում Հայաստանի 9 համայնքներում։
Սյունիքից բացի ավագանի ու քաղաքապետ են ընտրում նաև Շիրակի մարզկենտրոն Գյումրիում և Տավուշի մարզի Դիլիջան քաղաքում։