ԵՐԵՎԱՆ, 16 հոկտեմբերի – Sputnik. Հայաստանում առաջիկայում կարող են սկսել Covid թեստավորման պատասխան պահանջել ոչ թե 2 շաբաթը մեկ անգամ, այլ ամենշաբաթյա պարբերականությամբ։
Այս մասին այսօր լրագրողների հետ զրույցում ասել է ՀՀ առողջապահության նախարար Անահիտ Ավանեսյանը` պարզաբանելով, որ թեև իրենք արդյունավետ են համարում նախարարության՝ 14-օրյա պարբերականությամբ թեստավորում պահանջելու որոշումը, բայց ուսումնասիրում են նաև այլ երկրներում ընդունված պրակտիկան։
«Նման պահանջ սահմանելու իմաստն այն է, որ թեստավորվելուց հետո դրական պատասխան ստանալու պարագայում մարդիկ ինքնամեկուսանան, չգնան աշխատանքի, չվարակեն իրենց գործընկերներին, ընկերներին, անձանց, որոնց հետ հաղորդակցվում են»,– ասաց նախարարը։
Ինչ վերաբերում է պատվաստումներին, Ավանեսյանի խոսքով, արդեն շուրջ մեկ շաբաթ է, ինչ Հայաստանում ավելացել է պատվաստվողների թիվը։
«Եվ մենք ակնկալում ենք, որ հաջորդ շաբաթ պատվաստվողների թիվն ավելի կմեծանա»,-ասաց նա` հույս հայտնելով, որ պատվաստվողների թվի աճին զուգահեռ կնվազի վարակվածների թիվը։
«Աշնանն առհասարակ հիվանդացության աճ է գրանցվում: Արդեն 1800-ից 1900 նոր մահճակալ է տրամադրվում կորոնավիրուսով հիվանդների բուժման համար, բայց մեր ռեսուրսներն անվերջ չեն. դա միայն մահճակալներին չի վերաբերում, առաջին հերթին՝ բուժաշխատողներին: Մենք պետք է ամեն ինչ անենք առաջիկա երկու կամ երեք շաբաթների ընթացքում հնարավորինս զսպելու հիվանդության տարածումը»,– ասել է նախարարը։
Հիշեցնենք, որ ՀՀ առողջապահության նախարար Անահիտ Ավանեսյանի օգոստոսի 20-ի հրամանով սահմանվել է, որ հոկտեմբերի 1-ից սկսած ՀՀ աշխատողները պարտավոր են գործատուին ներկայացնել կա՛մ COVID-19-ի դեմ պատվաստման սերտիֆիկատ, կա՛մ յուրաքանչյուր 14 օրը մեկ COVID-19-ի ախտորոշման ՊՇՌ հետազոտության բացասական արդյունքը հավաստող, առավելագույնը 72–ժամյա վաղեմությամբ, փաստաթուղթ։
Հետագայում պարզաբանվեց, որ հրամանը գործում է հոկտեմբերի 14-ից։