ԵՐԵՎԱՆ, 16 հոկտեմբերի - Sputnik. Թուրքիայի նախագահ Ռեջեփ Թայիփ Էրդողանն ու Գերմանիայի կանցլեր Անգելա Մերկելը համատեղ ասուլիսի ժամանակ վիճել են կոալիցիոն կառավարության թերությունների մասին։ Տեղեկությունը հայտնում է ՌԻԱ Նովոստին:
Մերկելն աշխատանքային այցով Թուրքիայում է։
«Մերկելի ժամանակաշրջանը թուրք-գերմանական հարաբերություններում հաջող շրջան էր։ Բայց կոալիցիոն կառավարության հետ աշխատելը միշտ էլ դժվար է։ Թուրքիայում այդ ժամանակաշրջանում շատ խնդիրներ կային, բայց նախագահական համակարգին անցնելուն պես ազատվեցինք դրանցից ու սկսեցինք ինտենսիվ աշխատել», - ասել է Էրդողանը։
Մերկելն իր հերթին ասել է, որ կոալիցիոն կառավարությունը հարմար է Գերմանիայի համար, ու իր երկիրը մտադիր չէ անցում կատարել կառավարման նախագահական ձևին:
Էրդողանը հակադարձել է, որ իր հետ բանակցություններում Մերկելը բողոքել է կոալիցիոն կառավարության հետ ունեցած դժվարություններից։
«Դա ճիշտ է, սակայն կյանքն այդպիսինն է», - խոստովանել է Գերմանիայի կանցլերը:
«Թոռնիկս էլ է այդպես ասում․«Պապի, ինչ արած՝ կյանքն է այդպիսին», - ժպիտով պատասխանել է Էրդողանը՝ ներկաների մոտ ծիծաղ առաջացնելով։
Մերկելը վերջին անգամ է որպես Գերմանիայի կանցլեր Թուրքիա այցելել։