ԵՐԵՎԱՆ, 15 հոկտեմբերի – Sputnik. Հայաստանը գտնում է, որ Արցախում պետք է ուժեղացնել միջադեպերի հետաքննության եռակողմ մեխանիզմների ու հրադադարի և բոլոր ռազմական գործողությունների դադարեցման ռեժիմի վերահսկողությունը։ Այս մասին այսօր ԱՊՀ անդամ երկրների ղեկավարների խորհրդի առցանց նիստի ժամանակ հայտարարեց ՀՀ վարչապետ Նիկոլ Փաշինյանը։
«Չնայած քաղաքական բոլոր ջանքերին և հակառակ եռակողմ հայտարարությանը, մարդիկ շարունակում են զոհվել Լեռնային Ղարաբաղում և հայ-ադրբեջանական սահմանին։ Դրա համար առաջարկում եմ ուժեղացնել միջադեպերի հետաքննության և հրադադարի ռեժիմի պահպանման եռակողմ մեխանիզմները», - ասաց նա։
Հիշեցնենք` Ադրբեջանի զինված ուժերը հոկտեմբերի 14– երեկոյան հարձակվել էին Արցախի Մարտունու շրջանի Նոր Շեն բնակավայրի ուղղությամբ։ Լարվածություն է եղել նաև Ասկերանի շրջանի Հարավ գյուղի ուղղությամբ։ Հայկական կողմից կա 6 վիրավոր։
Ռուս խաղաղապահները տեղում միջոցներ են ձեռնարկել իրավիճակը հանդարտեցնելու համար։
Իսկ հոկտեմբերի 9–ին Մարտակերտի քաղաքային համայնքի տարածքում գյուղատնտեսական աշխատանքներ կատարելիս ադրբեջանական դիպուկահարի կրակոցից զոհվեց խաղաղ բնակիչ Արամ Տեփնանցը։