ԵՐԵՎԱՆ, 15 հոկտեմբերի – Sputnik. Վիտամին D-ի և չոր աչքի համախտանիշը փոխկապակցված են։ Այս մասին գրում է PubMed.gov-ը։
Վիտամին D-ի դեֆիցիտն աշխարհում խիստ տարածված երևույթ է։ Հայտնաբերվել է, որ արյան շիճուկում վիտամին D-ի մակարդակը չոր աչքի համախտանիշով բուժառուների մոտ նորմայից զգալիորեն ցածր է։
Վիտամին D–ի մասին
D վիտամինը մարդու օրգանիզմի անփոխարինելի մասն է կազմում։ Օրական անհրաժեշտ չափաբաժինը (RDA) 1 - 70 տարեկանում (ներառյալ հղիները և կերակրող մայրերը) կազմում է 15 մկգ կամ 600 ՄՄ խոլեկալցիֆերոլ։
D վիտամինի պակասի դեպքում օրգանիզմը վատ է յուրացնում սննդի մեջ պարունակվող կալցիումը և ֆոսֆորը, որի հետևանքով ոսկորները փափկում են և սկսում են ծռվել. երեխաների մոտ առաջանում է ռախիտ, իսկ մեծահասակների, հատկապես կանաց մոտ՝ ոսկրակակղանք ավելացնելով օստեոպորոզի ռիսկերը։
Վիտամին D-ի սննդային աղբյուր են բուսական. առվույտը, եղինջը, մաղադանոսը, սունկը, արևածաղիկը, եգիպտացորենը, որոշ ջրիմուռներ։
Այսպիսով, գիտնականներին հաջողվել է ապացուցել, որ մարդու աչքերի առողջությունը կախված է նաև սննդից և վիտամին D-ի չափաբաժնային օգտագործումից։
Վիտամին D-ն կանխարգելիչ ազդեցություն ունի տարիքային հիվանդությունների վրա և ապահովում է աչքի նյութի բջջային հաղորդակցությունը։ Դրա ցածր մակարդակը հանգեցնում է արցունքահեղուկի արտադրության նվազմանը, ինչի պատճառով առաջանում է այրոց, ծակծկելու զգացողություն, աչքերը դառնում են կարմիր և լույսի նկատմամբ զգայուն:
Այս ամենը չոր աչքի համախտանիշն է, որի դեպքում աչքերում բավականաչափ արցունք չի արտադրվում կամ դրանք շատ արագ են գոլորշիանում։