ԵՐԵՎԱՆ, 15 հոկտեմբերի - Sputnik. ԱՄՆ մուտքն այսուհետ կթույլատրվի միայն այն օտարերկրյա քաղաքացիներին, որոնք պատվաստվել են ԱՀԿ-ի կամ Ամերիկյան բժշկական կարգավորիչի (FDA) կողմից հաստատված պատվաստանյութերից մեկով: Այս մասին, ինչպես հաղորդում է ԱՄՆ Պետքարտուղարության մամուլի ծառայությունը, հայտարարել է ԱՄՆ արտաքին քաղաքական գերատեսչության մամուլի քարտուղար Նեդ Փրայսը։
Որոշումն ուժի մեջ կմտնի նոյեմբերի 8-ին։ Այդ ժամանակ ԱՄՆ մեկնող քաղաքացիները պետք է պատվաստման երկու դեղաչափն էլ ստացած լինեն։
«Այսօր Սպիտակ տան հայտարարած նոր մուտքի քաղաքականությունը ԱՄՆ ժամանող օտարերկրացիներից պահանջում է ցույց տալ COVID-19-ի դեմ ամբողջական պատվաստման սերտիֆիկատը։ Այն ուժի մեջ է մտնում նոյեմբերի 8-ին»,- ասել է Նեդ Փրայսը:
Նշենք, որ ռուսական պատվաստանյութերից ոչ մեկը, ներառյալ ամենատարածված «Սպուտնիկ V»-ն, ԱՀԿ-ի կամ FDA-ի հավանությունն առայժմ չի ստացել: