ԵՐԵՎԱՆ, 14 հոկտեմբերի – Sputnik. Կառավարությունն այսօրվա նիստում հավանություն տվեց «ՀՀ քաղաքացու անձնագրի մասին» և «Նույնականացման քարտերի մասին» օրենքներում փոփոխությունների նախագծին:
ՀՀ պաշտպանության նախարութան հետ խորհրդակցությունների արդյունքում ոստիկանության հեղինակած փոփոխություններով առաջարկվում է նախազորակոչային, զորակոչային տարիքի կամ պարտադիր զինվորական ծառայության մեջ գտնվող արական սեռի քաղաքացիներին անձնագրեր տրամադրել ոչ թե մինչև 18, այլ մինչև 19 տարեկանը լրանալը:
Ըստ նախագծում ներկայացվող հիմնավորումների` զինապարտ տղաներն անձնագրի վավերականության ժամկետի պատճառով հաճախ հնարավորություն չեն ունենում մասնակցել օտարերկրյա պետություններում անցկացվող սպորտային, մշակութային, զինվորական կամ այլ միջոցառումների:
Բացի այդ, Հայաստանյաց առաքելական եկեղեցու Երուսաղեմի հայոց պատրիարքության ժառանգավորաց վարժարանում ուսանող կամ պատրիարքության միաբան հանդիսացող և դեռևս պարտադիր զինվորական ծառայություն չանցած քաղաքացիները նույնպես Երուսաղեմում օրինական հիմքերով բնակության համար հաճախ խոչընդոտների են հանդիպում` կապված իրենց անձնագրերի վավերականության ժամկետի հետ:
Նույն խնդրի հետ են բախվում նաև օտարերկրյա պետություններում ընդունելության քննություններին մասնակցող դիմորդները, որոնք անձնագրի ժամկետի պատճառով չեն կարողանում վիզա ստանալ։
Նախագծերի փաթեթն առաջիկայում կներկայացվի ԱԺ քննարկմանը։ Այն ընդունվելու դեպքում ուժի մեջ կմտնի 2022թ–ից։