ԵՐԵՎԱՆ, 14 հոկտեմբերի – Sputnik. Մինչև 3 հա հողատարածքներում ոռոգման կաթիլային համակարգերի ներդրման դեպքում ջրօգտագործողները կազատվեն ոռոգման ջրի վարձավճարներից։
Այս մասին որոշումն այսօր կայացվեց ՀՀ կառավարության հերթական նիստում` Տարածքային կառավարման և ենթակառուցվածքների նախարար Գնել Սանոսյանի առաջարկով։
«Սխեման բավական պարզ է. հողատարածքը պետք է ընդգրկված լինի ՋՕԸ–ի կողմից սպասարկվող տարածքում, պետք է ունենա պայմանագիր։ ՋՕԸ–ին պետք է ներկայացնեն որոշակի փաստաթղթեր, որոնք հետագայում Ջրային կոմիտեի և մեր նախարարության միջոցով կներկայացվեն կառավարություն, և համապատասխան փոխհատուցումները կստանան»,– նախագիծը ներկայացնելով` պարզաբանեց Սանոսյանը։
ՀՀ վարչապետ Նիկոլ Փաշինյանն էլ արձանագրեց, որ մինչև 3 հա տարածքում կաթիլային ոռոգման համակարգ տեղադրողների ջրի 5 տարվա վարձավճարի ամբողջական փոխհատուցումը կառավարության նախընտրական խոստումներից է։
«Պետք է արձանագրենք, որ ոռոգման այն մեթոդը, որն այսօր ՀՀ–ում շարունակում է լայնորեն կիրառվել, ուղղակի ապագա չունի, որովհետև ջրային ռեսուրսները գնալով ավելի թանկանալու են, կլիմայի գլոբալ փոփոխության արդյունքում դառնալու են ավելի պահանջված, երաշտներն առաջիկայում ավելի տեսանելի են լինելու, գերնորմատիվային հողերի թիվը մեծանալու է, ջրի սպառումը` ավելանալու և այլն,– ասաց Փաշինյանը,– հետևաբար, մենք ամեն ինչ պիտի անենք, որ ամբողջ հանրապետությունն անցնի կաթիլային ոռոգման։
Վարչապետը գյուղացիական տնտեսություններին խորհուրդ տվեց արդեն այս պահից սկսած մտածել կաթիլային ոռոգման համակարգ ներդնելու մասին և մինչև 2027թ-ը ոռոգման ջրի դիմաց ոչ մի լումա չվճարել։