ԵՐԵՎԱՆ, 14 հոկտեմբերի – Sputnik. Standard&Poors միջազգային խոշորագույն վարկանշային կազմակերպությունը 2021 թ. հոկտեմբերի 12-ին առաջին անգամ վարկանշել է Հայաստանի կառավարությանը և շնորհել է արտարժույթով և ազգային արժույթով երկարաժամկետ պարտավորությունների թողարկման «B+» սուվերեն վարկանիշ՝ «դրական» հեռանկարով։
Այսօր կառավարության նիստում, մեկնաբանելով այս իրադարձությունը, ՀՀ ֆինանսների նախարար Տիգրան Խաչատրյանը հայտնեց, որ Standard&Poors–ի դրական վարկանիշը նշանակում է, որ Հայաստանում տնտեսության վիճակի բարելավմանն ուղղված գործոնները գերակշռող են, և առաջիկա 12 ամիսների ընթացքում կարող են բերել Հայաստանի սուվերեն վարկանիշի բարձրացման։
«Standard&Poors–ը նշել է, որ եթե առաջիկա 2-3 տարիների ընթացքում ՀՀ–ում տնտեսական սպասումներն արդարացվեն, արտաքին խոցելիությունը նվազի և պետական բյուջեի կատարողականը լինի սպասվածից դրական, ապա դա կբերի նաև սուվերեն վարկանիշի հետագա բարելավման»,– ասաց նախարարը։
Նրա խոսքով` Հայաստանին տրված վարկանիշը հիմնված է այն հանգամանքների վրա, որ, չնայած արտաքին ճնշումներին, Հայաստանը հաղթահարել է համավարակի և ռազմական կոնֆլիկտի հետևանքները` առանց վտանգելու երկրի տնտեսական կայունությունը։
«Standard&Poors–ը ակնկալում է, որ կառավարության 5-ամյա ծրագրի իրագործումը կհանգեցնի ավելի արագ տնտեսական աճի»,– ասաց Խաչատրյանը։
Հայաստանին տրված վարկանիշի շնորհիվ, ֆինանսների նախարարի մեկնաբանմամբ, ՀՀ–ում գործող կազմակերպությունները միջազգային ավելի հեշտ վարկավորման հնարավորություն են ստացել ու դրա արդյունքում կարող են ավելի հեշտ ու էժան վարկեր ստանալ միջազգային ֆինանսական կազմակերպություններից։