ԵՐԵՎԱՆ, 13 հոկտեմբերի - Sputnik. Հնդկաստանի արտաքին գործերի նախարար Սուբրամանյամ Ջայշանկարի այցը Հայաստան վկայում է երկու բարեկամ պետությունների ու ժողովուրդների միջև օրեցօր խորացղ ու ընդլայնվող հարաբերությունների մասին։ Այս մասին այսօր Հնդկաստանի ԱԳ նախարարի հետ առանձնազրույցից ու ընդլայնված կազմով հանդիպումից հետո կայացած մամուլի ասուլիսում հայտարարեց ՀՀ ԱԳ նախարար Արարատ Միրզոյանը։
«Անկասկած այս այցը կխթանի հայ–հնդկական համագործակցությունը բոլոր ոլորտներում, և սա բխում է երկու երկրների շահերից»,– ասաց Միրզոյանը` արձանագրելով, որ Հնդկաստանը Հայաստանի կարևորագույն գործընկերներից է, և որ Հնդկաստանի հետ համագործակցության հետագա ամրապնդումը ՀՀ արտաքին քաղաքական առաջնահերթություններից է։
Նրա խոսքով` Հնդկաստանը` որպես արագ զարգացող ու խաղաղասեր պետություն, կարող է խոշոր ներդրում ունենալ Հարավային Կովկասում կայունության, խաղաղության ու զարգացման հարցում։
«Մենք բարձր ենք գնահատում Հնդկաստանի սկզբունքային դիրքորոշումն ու շարունակական աջակցությունը ԼՂ հակամարտության խաղաղ և համապարփակ կարգավորմանը` ԵԱՀԿ ՄԽ համանախագահության մանդատի շրջանակներում»,– ասաց ԱԳ նախարարը` հավելելով, որ Հայաստանը բարձր է գնահատում 2021թ–ի մայիսին Հնդկաստանի ԱԳՆ հայտարարությունն այն մասին, որ ադրբեջանական ԶՈւ–ն պետք է հետ քաշվի ՀՀ ինքնիշխան տարածքից։
«Մեր կողմից վերահաստատում ենք ՀՀ դիրքորոշումը`Ջամմուի և Քաշմիրի հարցում Հնդկաստանին սատարելու առումով»,–ասաց Միրզոյանը։
ԱԳ նախարարը նաև հայտարարեց, որ Հայաստանի ու Հնդկաստանի դիրքորոշումներըբ համընկնում են նաև ահաբեկչության դեմ պայքարի, ծայրահեղականության ու վարձկան ահաբեկիչների` հակամարտության գոտիներ տեղափոխելու անթույլատրելիության հարցերում։
Միրզոյանը նաև գոհունակութոյւն հայտնեց հանդիպմանը ձեռք բերված պայմանավորվածությունների առիթով։
Նրա խոսքով` պայմանավորվածություն է ձեռք բերվել միջազգային կազմակերպություններում համագործակցությունը շարունակելու, փոխադարձ աջակցության վերաբերյալ։
«Այս տարի մեր դիվանագիտական հարաբերությունների 30-ամյակն է լրանում` հոբելյան է, և մենք պետք է քայլեր ձեռնարկենք քաղաքական, տնտեսական, պաշտպանական ու մշակութային ոլորտներում մեր հարաբերությունները նոր մակարդակի բարձրացնելու համար»,– ասաց ՀՀ ԱԳ նախարարը։
Ջայշանկարը Twitter- ում գրել էր, որ ուրախ է լինել Հնդկաստանի առաջին արտգործնախարարը, որն այցելում է Հայաստան, և որ պատմական կապ է տեսնում հայաստանի ու իր հայրենիքի միջև:
Նշենք, որ 1992թ. օգոստոսի 31-ին Հայաստանի և Հնդկաստանի միջև ստորագրվել է արձանագրություն` դիվանագիտական հարաբերությունների հաստատման վերաբերյալ:
Իսկ 1999 թվականից երկու երկրներում բացվել են դեսպանություններ։
Դիվանագիտական հարաբերությունների հաստատումից ի վեր Հայաստանի և Հնդկաստանի միջև ստորագրվել է 34 փաստաթուղթ: Եվս 7-ը գտնվում են քննարկման փուլում: