ԵՐԵՎԱՆ, 11 հոկտեմբերի – Sputnik. Տոկիոյում կատարված հետազոտության արդյունքում պարզվել է, որ բոլոր երկարակյաց կամավորներն իրենց ամենօրյա սննդակարգում օգտագործել են մեծ քանակությամբ սպիտակուցներ։ Հետաքրքիր հետազոտությանն անդրադարձել է Yahoo News Japan պարբերականը:
Հետազոտությունն անցկացրել է «Կյուսայ» ընկերությունը, որը կենտրոնացած է սննդամթերքի արտադրության վրա։ Մասնակցել են 100 կամավորներ՝ 100 տարեկանից բարձր։
Տոկիոյի ինստիտուտի գիտնականները հաստատել են ուսումնասիրության արդյունքները։ Պարզվել է, որ եթե սննդի որակն ու քանակը որոշակի ցուցանիշից նվազում է, այն հանգեցնում է կյանքի տևողության կրճատման: Մինչդեռ բազմազան և հարուստ սնունդը, հակառակը, բարելավում է առողջությունը, բարձրացնում կյանքի որակը և երկարաձգում այն:
Սպիտակուցը կատարում է «շինարարական» գործառույթ մարդու մարմնի համար։ Այն մասնակցում է արյան, մկանների, ոսկորների, օրգանների և մաշկի ձևավորմանը։ Օրգանիզմում սպիտակուցների մակարդակը լրացնելու համար գիտնականները խորհուրդ են տալիս սննդի մեջ օգտագործել «ամինաթթվի ինդեքսով» բարձր պարունակություն ունեցող մթերք՝ հավի, խոզի, տավարի միս, ձու, կաթ, սաղմոն, սոյա:
Ատամների վիճակը ևս կարևոր դեր է խաղում մարդու կյանքում։ Ատամնաբույժների ճապոնական ասոցիացիան հայտարարում է, որ սերտ կապ կա առողջ ատամների քանակի և առողջ կյանքի միջև։ Հետազոտություններն ապացուցել են, որ ամուր և առողջ ատամներով մարդկանց մոտ հազվադեպ են կոտրվում ոսկորները, բացի այդ, առողջ ատամներով մարդիկ հազվադեպ են տառապում ծերունական թուլամտությամբ։ Ոսկորներն ուժեղացնելու համար խորհուրդ է տրվում ավելացնել սննդակարդում պանիր, ընկույզ և բրոկոլի։
Իսկ աթերոսկլերոզի, շաքարախտի, սիրտ-անոթային համակարգի հիվանդությունների զարգացումը կանխելու համար խորհուրդ է տրվում հնարավորինս նվազեցնել կամ ամբողջությամբ բացառել աղի և շաքարի օգտագործումը: Ծերացումը դանդաղեցնել կօգնեն կանաչ թեյը, ավոկադոն և սաղմոնը։ Խորհուրդ է տրվում սնվել օրական 3 անգամ՝ միշտ միևնույն ժամին։